У Беларусі ў межах выканання дэкрэта «Аб папярэджанні сацыяльнага ўтрыманства» распрацаванае праграмнае забеспячэнне, якое дазволіць у аўтаматычным рэжыме сфармаваць базу такіх грамадзян. Пра гэта на прэс-канферэнцыі 12 лютага ў Мінску паведаміў начальнік галоўнага ўпраўлення падаткаабкладання фізічных асоб Міністэрства па падатках і зборах Міхаіл Расолька.
Ён адзначыў, што сёлета падатковыя органы накіруюць паведамленні на выплату збору грамадзянам, якія не ўдзельнічалі ў 2015 годзе ў фінансаванні дзяржаўных расходаў.
«Распрацаванае праграмнае забеспячэнне, якое дазволіць у аўтаматычным рэжыме сфармаваць базу такіх плацельшчыкаў. Зараз мы праводзім тэставанне з дзяржаўнымі органамі працы гэтага праграмнага забеспячэння», — расказаў начальнік галоўнага ўпраўлення падаткаабкладання фізічных асоб МПЗ.
Такім чынам, працягнуў ён, да 1 кастрычніка 2016 года грамадзяне, якія не ўдзельнічалі ў 2015 годзе ў фінансаванні дзяржаўных расходаў, атрымаюць паведамленні на выплату збору.
Міхаіл Расолька таксама паведаміў, што на сённяшні дзень 820 грамадзян добраахвотна прадставілі паведамленні пра тое, што ў 2015 годзе яны не ўдзельнічалі ў фінансаванні дзяржрасходаў. Ім выстаўлена да выплаты 2,5 млрд. рублёў.
У лістападзе 2015 года ўрад вызначыў, што базу даных плацельшчыкаў збору на фінансаванне дзяржаўных расходаў будзе весці Міністэрства па падатках і зборах. У базу даных будзе ўключацца наступная інфармацыя аб грамадзянах: ідэнтыфікацыйны нумар, прозвішча, імя, імя па бацьку (калі такое маецца) на рускай мове, дата нараджэння, пол, грамадзянства, звесткі аб рэгістрацыі па месцы жыхарства (месцы знаходжання), від, серыя і нумар дакумента, які сведчыць асобу. Таксама сюды будзе ўключацца інфармацыя аб пачатку і заканчэнні перыяду фінансавання грамадзянамі дзяржрасходаў, сумы выплачаных імі падаткаў.
Інфармацыю для базы даных прадастаўляюць Фонд сацыяльнай абароны насельніцтва, Мінпрацы, «Белдзяржстрах», шэраг іншых міністэрстваў, а таксама мясцовыя органы ўлады, творчыя саюзы і ўстановы адукацыі. Інфармацыя для фармавання базы даных падаецца ў выглядзе электронных дакументаў.
Нагадаем, Аляксандр Лукашэнка 2 красавіка 2015 года падпісаў дэкрэт № 3 «Аб папярэджанні сацыяльнага ўтрыманства, які прыняты «з мэтай стымулявання працаздольных грамадзян да працоўнай дзейнасці і забеспячэння выканання імі канстытуцыйнага абавязку па ўдзеле ў фінансаванні дзяржаўных расходаў».
Згодна з дэкрэтам, грамадзяне Беларусі, а таксама замежныя грамадзяне і асобы без грамадзянства, якія пастаянна пражываюць у рэспублiцы і не ўдзельнічаюць у фінансаванні дзяржвыдаткаў або ўдзельнічаюць у такім фінансаванні менш за 183 каляндарныя дні за год, павінны выплачваць збор у 20 базавых велічынь (сёння гэта 4 млн 200 тыс. рублёў).
Цяпер чытаюць
Полк Каліноўскага паведаміў пра гібель трох байцоў4
Каментары