Улады Грэцыі адклікалі свайго амбасадара з Аўстрыі пасля таго, як Вена не запрасіла Афіны на канферэнцыю па міграцыйных пытаннях.
Амбасадара адклікалі для кансультацый. У паведамленні МЗС Грэцыі гаворыцца, што дзеянні Афін тлумачацца жаданнем захаваць сяброўскія адносіны паміж краінамі.
У сераду прадстаўнікі 10 балканскіх дзяржаў прысутнічалі на перамовах у Аўстрыі. На сустрэчы абмяркоўваліся меры па абмежаванні колькасці мігрантаў.
У Грэцыі, якую на перамовы не запрасілі, заявілі, што цяжар урэгулявання міграцыйнага крызісу не павінен ускладацца на адну краіну.
Аўстрыя і некалькі балканскіх краін маюць намер абмежаваць колькасць мігрантаў, што павялічыць нагрузку на Грэцыю, асцерагаюцца ў Афінах.
На мінулых выходных адбыўся інцыдэнт на македонска-грэчаскай мяжы. Македонія адмовілася пускаць афганцаў. Мігранты пачалі пратэставаць, сітуацыя напружвалася, і ўлады Грэцыі былі вымушаныя адвезці афганцаў у Афіны.
У лік мер па абмежаванні прытоку мігрантаў уваходзяць зняцце адбіткаў пальцаў ва ўсіх, хто спрабуе перайсці мяжу. Мігрантам без дакументаў або з падробленымі пашпартамі можа быць забаронены ўезд.
Некаторыя краіны просяць даць ім права пускаць толькі тых мігрантаў, якія маюць патрэбу ў абароне. Еўрапейскія чыноўнікі пад гэтай фармулёўкай разумеюць грамадзян Сірыі і Ірака.