Улады Беларусі могуць забараніць азербайджанскай авіякампаніі AZAL палёты ў Мінск
Улады Беларусі апавясцілі авіякампанію «Азербайджанскія авіялініі» (AZAL) аб магчымасці прыпынення з 15 красавіка палётаў паміж Мінскам і Баку з-за незадаволенасці льготнай тарыфнай палітыкай AZAL, паведамляе партал бізнес-інфармацыі ABC.az.
Паводле слоў віцэ-прэзідэнта AZAL і дырэктара Дзяржаўнай адміністрацыі грамадзянскай авіяцыі Арыфа Мамедава, свае прэтэнзіі беларускі бок патлумачыў тым, што азербайджанскае ЗАТ знізіла кошт авіябілетаў ва ўрон канкуруючаму авіяперавозчыку (авіякампаніі «Белавія»).
«У Беларусі адзначылі, што пры ўстаноўцы нізкіх цэн на авіябілеты трэба атрымаць згоду і процілеглага боку. Калі пытанне не вырашыцца ў найбліжэйшы час, то Беларусь прыпыніць палёты. Думаю, што, калі яны будуць настойваць на падаражанні білетаў або прыпыненні палётаў, мы пойдзем з імі на кампраміс», — заявіў Мамедаў.
Ён паведаміў, што для вырашэння праблемы AZAL аператыўна накіруе зварот у пасольства Беларусі ў Азербайджане і азербайджана-беларускую сумесную камісію.
«Мы запрашаем беларускі бок на перамовы з мэтай найхутчэйшага вырашэння пытання», — сказаў віцэ-прэзідэнт AZAL.
Цяпер палёты ў Мінск выконваюцца «Азербайджанскімі авіялініямі» пад нізкабюджэтным брэндам AZALJET. Авіякампанія пачала палёты пад гэтай гандлёвай маркай 28 сакавіка 2016 года. Адной з мэтаў частковага пераходу на лаўкост-мадэль стала імкненне скласці канкурэнцыю замежным нізкатарыфным аператарам, якія выказваюць цікавасць да Азербайджана.
Як гаворыцца ў паведамленні AZAL, пад брэндам AZALJET будуць выконвацца рэйсы па найбольш запатрабаваных кірунках і працягласцю да трох з паловай гадзін. Сюды адносяцца рэйсы ў такія гарады, як Масква, Стамбул, Дубай, Тбілісі, Санкт-Пецярбург, Мінск, Кіеў, Львоў, Тэгеран, Анкара, турэцкія курорты Анталія, Ізмір, Бадрум і Даламан і шэраг іншых гарадоў.
Кошт авіябілета на рэйсы AZALJET у адным кірунку складзе ад 49 еўра пры вылеце з/у Баку па любым з вышэйзгаданых кірункаў, туды-назад — ад 98 еўра. У гэты кошт уваходзяць усе падаткі і зборы.
Цяпер чытаюць
Ад сачэння за топ-менеджарамі да пікантных драм ХІХ стагоддзя. Як працуе дэтэктыўнае агенцтва «Рэкс» Аляксандра Азарава8
Ад сачэння за топ-менеджарамі да пікантных драм ХІХ стагоддзя. Як працуе дэтэктыўнае агенцтва «Рэкс» Аляксандра Азарава
Фядута рэзка адказаў Калеснікавай: За што вы змагаліся ў 2020 годзе, не цікавіць нікога, акрамя мядзведзяў з берлінскага заапарка, якія вас атачаюць4848
Каментары