Балгарыя мае намер спрыяць далейшаму развіццю адносін Беларусі і Еўрасаюза, заявіў міністр замежных спраў Балгарыі Даніэл Мітаў 11 красавіка ў Мінску пасля сустрэчы з кіраўніком МЗС Беларусі Уладзімірам Макеем.
«З задавальненнем хацелі б адзначыць змяненне ў адносінах Беларусі і ЕС, — сказаў Мітаў. — Хацелася б, каб гэтая тэндэнцыя захавалася і ў будучыні. Балгарыя будзе спрыяць гэтаму».
Ён выказаў надзею, што рашэнне ЕС аб скасаванні санкцый супраць Беларусі прынясе карысць усім бакам. «Зразумела, гэта павінна адбывацца пры ўмове захавання правоў чалавека», — падкрэсліў Мітаў.
Міністр таксама адзначыў, што Балгарыя, як цяперашні старшыня Камітэта міністраў Рады Еўропы, надае таксама вялікую ўвагу развіццю адносін паміж Беларуссю і СЕ.
«Беларусь — выключна важная для нас краіна па многіх прычынах, у тым ліку нашай гістарычнай, культурнай і рэлігійнай блізкасці, — сказаў Мітаў. — З аптымізмам назіраем у апошні час за паглыбленнем адносін паміж нашымі краінамі ў розных сферах».
У сваю чаргу Макей адзначыў, што ў Беларусі візіт Мітава разглядаюць як «важны этап на шляху далейшага развіцця адносін паміж Беларуссю і Балгарыяй». Паводле яго слоў, падчас сустрэчы бакі абмеркавалі стан і перспектывы адносін паміж Беларуссю і Балгарыяй, а таксама з ЕС і Радай Еўропы.
«Мы надалі асаблівую ўвагу праблематыцы паразумення з Радай Еўропы, у тым ліку абмеркавалі ўсе існуючыя адчувальныя пытанні», — сказаў Макей.
Паводле яго слоў, бакі таксама дамовіліся найбліжэйшым часам правесці пасяджэнне міжурадавай камісіі па гандлёва-эканамічным і навукова-тэхнічным супрацоўніцтве.
Мітаў удакладніў, што пасяджэнне камісіі, хутчэй за ўсё, пройдзе ў чэрвені гэтага года ў Сафіі.
«Мы дамовіліся цесна працаваць, каб нарошчваць наша ўзаемадзеянне і развіваць кантакты ва ўсіх сферах. У нас практычна не маецца разыходжанняў па пытаннях далейшага развіцця беларуска-балгарскіх адносін і адносін з ЕС», — сказаў Макей.
