Прэзідэнт Македоніі Георге Іванаў падпісаў указ аб памілаванні палітыкаў, замяшаных у буйным карупцыйным скандале, што справакаваў палітычны крызіс у краіне, чым выклікаў гнеў македонскай апазіцыі і здзіўленне кіраўніцтва ЕС.
Ён таксама распарадзіўся спыніць следства па справе аб перавышэнні паўнамоцтваў шэрагам чыноўнікаў, пра якія стала вядома з запісаў іх размоў.
Прэзідэнт сказаў, што хоча «пакласці канец агоніі» напярэдадні датэрміновых выбараў, прызначаных на чэрвень. Аднак яго дзеянні выклікалі шквал крытыкі як унутры краіны, так і за яе межамі.
У лютым 2015 года лідар македонскай апазіцыі Зоран Заеў апублікаваў запісы размоваў шэрагу міністраў, з якіх, сярод іншага, вынікае, што вынікі парламенцкіх выбараў у краіне ў красавіку 2014 года былі сфальсіфікаваныя, а таксама што прадстаўнікі ўлады пакрываюць нейкае забойства.
Акрамя таго, Заеў абвінаваціў урад у праслухоўванні тэлефонаў 20 тысяч чалавек, сярод якіх палітыкі, журналісты і рэлігійныя лідары.
У прыватнасці, апазіцыянеры сцвярджалі, што кіраўнік спецслужбы Саша Міялкаў і міністр унутраных спраў Гардана Янкулоская спрабавалі ўзяць пад кантроль прэсу, судовую ўладу і выбарчыя органы пры дапамозе праслухоўвання тэлефонаў.
Скандальныя матэрыялы выклікалі ў Македоніі хвалю абурэння. Тады ў сталіцы Македоніі Скоп'е прайшла шматтысячная акцыя, удзельнікі якой патрабавалі адстаўкі ўраду.
Уступленне ў ЕС пад пагрозай
У тэлезвароце ў аўторак Георге Іванаў сказаў, што паступае так у інтарэсах нацыі.
«Я вырашыў пакласці канец агоніі, і, вобразна кажучы, рассячы вузел», — заявіў прэзідэнт, не назваўшы ніводнага з падследных чыноўнікаў па імені.
Аднак Зоран Заеў назваў дзеянні прэзідэнта незаконнымі і заклікаў сваіх прыхільнікаў выйсці на вуліцы Скоп'е.
Паводле яго слоў, прадастаўленыя ім і яго паплечнікамі запісы сведчаць аб маштабнай карупцыі ў самых высокіх кабінетах улады, якая выяўляецца ў нямэтавым выдаткоўванні казённых грошай, крымінальных пераследах палітычных апанентаў і нават у пакрыванні забойстваў.
Некалькі сотняў чалавек сабраліся пазней ля будынка пракуратуры, патрабуючы аднавіць расследаванне па гэтых абвінавачваннях.
«Тое, што зрабіў прэзідэнт Іваноў, ніяк не вяжацца з маімі ўяўленнямі пра вяршэнства закона», — сказаў еўрапейскі камісар па пытаннях пашырэння і палітыкі добрасуседства Ёханэс Хан.
Ён таксама дадаў, што гэты крок ставіць пад пагрозу планы Македоніі на ўступленне ў склад ЕС.
Урад Македоніі адмаўляе абвінавачванні ў свой адрас і абвінавачвае апазіцыянера Зорана Заева ў імкненні дэстабілізаваць балканскую нацыю.
Каментары