Сёння ў Рыа — паўфінал у Самсонава і баскетбольны матч Беларусь — Турцыя
11 жніўня на Гульнях у Рыа-дэ-Жанейра будзе разыграна 19 камплектаў медалёў.
У спаборніцтвах па настольным тэнісе Уладзімір Самсонаў, для якога цяперашнія Гульні ўжо шостыя (і самыя паспяховыя) у кар'еры, правядзе паўфінальны паядынак. Сапернікам будзе двухразовы (у асабістым і камандным турнірах) залаты медаліст Алімпіяды-2012 Цзыке Чжан. Пачатак матча ў 18.00.
На вяслярным канале «Лагуна», дзе ўчора з-за непагадзі ўжо другі раз на гэтых Гульнях былі адкладзеныя спаборніцтвы па акадэмічным веславанні, пройдуць паўфінальныя заезды. Мужчынская чацвёрка распашная (Вадзім Лялін, Дзяніс Мігаль, Ігар Пашэвіч, Мікалай Шарлап) пазмагаецца за выхад у фінал у адным заездзе з экіпажамі з Францыі, Канады, Вялікабрытаніі, Германіі і Галандыі. Для выхаду ў медальны раўнд трэба трапіць у лік трох лепшых лодак. Пачатак заезду - у 15.30.
Беларускія баскетбалісткі правядуць перадапошні паядынак групавой стадыі супраць каманды Турцыі, які стане ключавым у барацьбе за пуцёўку ў плэй-оф. Пачатак матча ў 18.15 па мінскім часе.
У кваліфікацыйных стартах у плаванні на 100 м батэрфляем выступяць чэмпіён Еўропы 2014 года Яўген Цуркін і Павел Санковіч. У Санковіча заплыў запланаваны на 20.25, у Цуркіна - на 20.31. Калі беларусы праб'юцца ў паўфінал, то працягнуць барацьбу ўжо раніцай 12 жніўня па мінскім часе - у 5.34 і 5.42.
Цяпер чытаюць
Былога супрацоўніка контрразведкі КДБ арыштавалі за здраду дзяржаве8
Каментары