У жніўні тэрміновыя валютныя ўклады насельніцтва скараціліся, нягледзячы на налічаныя працэнты, на 39,5 млн долараў. У той жа час рублёвыя ўклады насельніцтва з улікам налічаных працэнтаў павялічыліся на 65,3 млн дэнамінаваных рублёў.
Па стане на 1 верасня тэрміновыя рублёвыя ўклады насельніцтва склалі 2,66 млрд дэнамінаваных рублёў і павялічыліся ў параўнанні з пачаткам года з улікам налічаных працэнтаў на 1,8%.
У той жа час тэрміновыя валютныя ўклады насельніцтва, паводле даных Нацбанка, на 1 верасня складалі 7 млрд 197 млн долараў і скараціліся ў параўнанні з пачаткам года амаль на 494,5 млн долараў.
Аналітыкі фінансавага рынку тлумачаць скарачэнне валютных укладаў фізічных асоб у банкаўскай сістэме тым, што насельніцтва імкнецца за кошт назапашаных раней зберажэнняў падтрымліваць больш высокі ўзровень жыцця ва ўмовах паніжэння даходаў. Нагадаем, рэальныя даходы насельніцтва ў першым паўгоддзі скараціліся на 7%.
«Сродкі ад продажу валюты насельніцтва траціць на бягучае спажыванне. Даходы ў насельніцтва ўпалі, але жыццё не спынілася, і насельніцтва спрабуе падтрымліваць лад жыцця за кошт назапашаных раней зберажэнняў», — адзначыў у размове з карэспандэнтам БелаПАН старшы аналітык форэкс-брокера Forex Club Валерый Палхоўскі.
З гэтай высновай згодныя і спецыялісты Нацыянальнага банка. «Пры істотным зніжэнні даходаў насельніцтва захоўвае сваю звычку да спажывання», — адзначаў летам гэтага года падчас адной з канферэнцый начальнік галоўнага ўпраўлення манетарнай палітыкі і эканамічнага аналізу Нацбанка Дзмітрый Мурын.
Паводле інфармацыі БелаПАН, насельніцтва захоўвае асноўны аб'ём сваіх зберажэнняў у сямі найбуйнейшых банках (там знаходзіцца 90% усіх банкаўскіх укладаў насельніцтва).
Так, на 1 жніўня аб'ём укладаў насельніцтва ў «Беларусбанку» складаў 8,5 млрд рублёў, у «Белаграпрамбанку» — 3,3 млрд, у «БПС-Ашчадбанку» — 1,6 млрд, у «Белінвестбанку» — 1,3 млрд, у «Прыёрбанку» — амаль 1 млрд, у «Белаграпрамбанку» і ў «Банку БелВЭБ» — 0,87 млрд і 0,83 млрд рублёў адпаведна.
Каментары