Пасля атакі БПЛА на нафтасховішча пад Рыбінскам прайшоў мазутны дождж
Раніцай 14 чэрвеня ў Рыбінскім рэгіёне Яраслаўскай вобласці Расіі пасля начной атакі беспілотнікаў выпаў чорны дождж. Нафтавая плёнка пакрыла прыватныя дамы, садовую мэблю, цяпліцы і расліны ў агародах.
Выпадзенне брудных ападкаў зафіксавана ў садовых таварыствах у раёне вёскі Волкава, піша 76.ru. Гэты населены пункт месціцца прыкладна за 20 кіламетраў ад Рыбінска і ўсяго за некалькі кіламетраў напрамую ад атакаванага аб'екта.
Мясцовыя жыхары шакаваныя маштабамі забруджвання.
«Я ў шоку. Прыехалі, а ў нас уся дача, наогул усё ў гэтым мазуце. Усе расліны, усё. «Дождж» прайшоў», — распавяла журналістам мясцовая дачніца.
Мяркуючы з кадраў, якія публікуюць у сацыяльных сетках, шчыльная чорная плёнка пакрыла лісце дрэў і кустоў, хатніх жывёл, садовыя пабудовы.
«Мы зусім не ведаем, што рабіць. Гэта гады працы, дзясяткі тысяч рублёў, столькі догляду за садам», — скардзяцца пацярпелыя расіяне.
Экалагічнае надзвычайнае здарэнне стала вынікам начной атакі дронаў. Магутны пажар успыхнуў на камбінаце «Тэмп» — сховішчу нафтапрадуктаў Дзяржрэзерву РФ, дзе захоўваліся вялікія аб'ёмы паліва.
Выглядае, што падчас выбуху і пажару велізарная колькасць прадуктаў гарэння і часціц нафтапрадуктаў была выкінута ў атмасферу, а пасля выпала на суседнія вёскі разам з ападкамі.
Нафтавыя дажджы ў красавіку ішлі ў Туапсэ пасля ўдараў па нафтабазе.
Каментары