Амерыканскія ўзброеныя сілы пачалі перасаджвацца на новыя мабільныя браніраваныя джыпы, паведаміў партал defencetalk.com.
Першыя сем машын L-ATV кампанія Oshkosh адправіла на днях на вайсковыя выпрабаванні ў часткі Сухапутных войск і Корпуса марской пяхоты ЗША. Усяго за гэты год вайскоўцы атрымаюць каля 100 новых джыпаў.
Джыпы L-ATV ужо выйгралі тэндар на замену 17 000 лёгкіх тактычных аўтамабіляў у амерыканскай арміі аб'ёмам у $6,7 млрд, аднак зараз выпрабаванні ў звычайных частках павінны выявіць «дзіцячыя хваробы» машын, якія будуць выпраўляцца перад пачаткам буйнасерыйнай вытворчасці.
Агулам колькасць набытых джыпаў можа дайсці да 54 600.
Вайскоўцы атрымаюць чатыры мадыфікацыі L-ATV - агульнага прызначэння, з лёгкім і цяжкім узбраеннем, шматмэтавы пікап. Машына мае масу 6,4 т, адаптыўную падвеску, модульную браню, можа дэсантавацца з парашутам. Рухавік мае аб'ём 6,6 літра і магутнасць 300 к.с.
Джып можа несці кулямёт калібру 7,62 мм, 40-міліметровы аўтаматычны гранатамёт, супрацьтанкавы ракетны комплекс ці іншае ўзбраенне, якое можна ставіць на знешні дыстанцыйна кіраваны модуль.
Знакамітыя Humvee (High Mobility Multipurpose Wheeled Vehicle — Высокамабільная шматмэтавая колавая машына) сталі на ўзбраенне арміі ЗША яшчэ ў 1985 годзе і ўдзельнічалі практычна ва ўсіх войнах і канфліктах, якія вяліся з тых часоў Амерыкай.
Пасля Вайны ў Персідскім заліве ў 1991 годзе машына, якая рэгулярна трапляла ў аб'ектывы журналістаў, стала такой папулярнай, што ў 1992 годзе з'явіўся яе цывільны варыянт — Hummer.
Каментары