Ліпковіч: Чаргінец сабатуе рашэнне Лукашэнкі

Адкрыты ліст да ўдзельнікаў з'езда Саюза пісьменнікаў Беларусі

Хацелася б пачаць, як правадыр сусветнага пралетарыяту У.І. Ленін: «Я раіў бы вельмі распачаць на гэтым з'ездзе шэраг пераменаў у нашым палітычным ладзе» (У.І. Ленін, ПСС, выданне 5-е, т. 45, стар. 343—348), але пакуль не час. І, тым не менш, паведамленне БелТА ад 2016/11/29 («СПБ ініцыюе абавязковае адлічэнне невялікіх сум (1—3%) ад продажу замежнай літаратуры, якая ўвозіцца з-за мяжы, і кніг, выдадзеных недзяржаўнымі выдавецтвамі, на развіццё беларускай літаратуры». «Менавіта такая літаратура пануе на кніжным рынку Беларусі. Мы ставім пытанне аб абароне літаратуры на тэрыторыі нашай краіны», — сказаў Мікалай Чаргінец) пасадзіла мяне за гэты ліст.

Павялічыць

Многія з дэлегатаў, ды і не толькі дэлегатаў, пра мяне чулі. Я не член вашага пісьменніцкага саюза, і не я напісаў «Вайну і мір», але ў мяне з вашым старшынёй таксама ёсць значныя стылістычныя рознагалоссі. У нейкі момант яны нават успыхнулі невялічкім вогнішчам у Севастопальскім парку горада Мінска. Аднак справа гэта даўняя, і адміністрацыйны прысуд ужо пакрыты тоўстым пластом пылу на забытым Богам стэлажы судовага архіва.

Я б і не звяртаў увагі на тое, што кажа ваш старшыня (ці мала што гавораць старыя), але ў гэты раз прамаўчаць не змагу.

У адным са шматлікіх інтэрв'ю ваш старшыня распавядаў, што залез у інтэрнэт і выпадкова знайшоў дзіцячую парнаграфію. Ну чаму ж перад тым, як патрабаваць увядзення абавязковага адлічэння на кнігі, якія ўвозяцца з-за мяжы, ён зноў не залез у інтэрнэт? Ён бы там, акрамя дзіцячай парнаграфіі, мог выпадкова знайсці праграму кандыдата ў прэзідэнты Рэспублікі Беларусь Аляксандра Лукашэнкі за 2015 год, дзе ў пункце 4 у якасці канкрэтнай меры (заўважу — не пустой дэкларацыі, а канкрэтнай меры) абвешчана «забарона на павышэнне старых і ўвядзенне новых падаткаў на працягу пяці гадоў. Любыя змены падаткаў — толькі ў бок змяншэння і спрашчэння».

За гэтую праграму, як і за кандыдата, які яе выконвае, працуючы зараз прэзідэнтам Рэспублікі Беларусь, прагаласавала больш за 80% выбаршчыкаў краіны. А цяпер ваш старшыня спрабуе ініцыяваць тое, што ў корані супярэчыць таму, за што галасавалі грамадзяне РБ.

Не ведаю, у чым справа, не разумею, што адбылося з вашым старшынёй і чаму ён пайшоў супраць прэзідэнта і яго перадвыбарнай праграмы ў гэты не просты для Бацькаўшчыны час. Я не доктар, каб ставіць дыягназ па публічных заявах. Хоць гэта і не мая справа, усё ж такі скажу: можа быць, членам пісьменніцкага аб'яднання варта задумацца над новым кіраўніком свайго саюза? У імя стабільнасці і адзінства Айчыны.

• 0
• 0
• 0
• 0
• 0
• 0
• 0
• 0