Маштабныя вучэнні вайсковай авіяцыі і СПА Беларусі адбудуцца ў лютым
На былым палігоне «Палескі» у Столінскім раёне ў лютым адбудуцца вялікія вучэнні пад кіраўніцтвам камандуючага ВПС і войскамі супрацьпаветранай абароны генерал-маёра Алега Дзвігалёва, піша афіцыйная газета Мінабароны.
Хоць галоўнымі ўдзельнікамі вучэнняў будуць нашы лётчыкі і зенітчыкі, разам з імі будуць таксама трэніравацца байцы усіх радоў войск гэтага віду Узброеных Сіл Беларусі, распавёў намеснік камандуючага генерал-маёр Сяргей Трус.
Усяго на вучэннях будуць дзейнічаць больш за 200 адзінак баявой тэхнікі, у тым ліку нядаўна набытыя — самалёты Як-130, верталёты Мі-8МТВ-5, зенітна-ракетныя комплексы Тор-М2.
Акрамя таго ўдзел у стрэльбах прымуць знішчальнікі МіГ-29 і зенітна-ракетныя комплексы Аса-АКМ.
Разам з ВПС і зенітчыкамі будуць вучыцца ваяваць радыётэхнічныя і спецыяльныя войскі, такім чынам, імаверна, у вучэннях будзе ўдзельнічаць неназваная выданнем радыёлакацыйная станцыя далёкага выяўлення «Праціўнік-ГЕ», набытая ў Расіі гэтым летам.
Каментары