На месцы крамы «Крышталь» на плошчы Перамогі адкрыецца фастфуд «Бульбастар»

Крама посуду «Крышталь» на праспекце Незалежнасці, 39 працуе апошнія месяцы — на яе месцы адкрыецца фастфуд з упорам на беларускую нацыянальную кухню. Гэтую інфармацыю TUT.BY пацвердзілі ў Мінгарвыканкаме і ў ЖРЭА Цэнтральнага раёна, на балансе якога знаходзіцца памяшканне крамы.

Павялічыць

Крама «Крышталь» на плошчы Перамогі адкрылася больш за 23 гадоў таму. Тут прадаюць посуд са шкла і фарфору беларускай і замежнай вытворчасці, скургалантарэю, касметыку. Перапрафіляваць аб'ект у цэнтры Мінска ў фастфуд, як распавядае інфармаваная крыніца, папярэдні акцыянер — Юрый Марозаў — хацеў яшчэ два гады таму. Тады кіраўніцтва крамы тлумачыла, што яна стала стратнай і прасіла даць дазвол на адкрыццё на месцы «Крышталя» піцэрыі Sbarro ці фастфуду Burger King, дадае суразмоўца. Але горад насустрач не пайшоў, як і ў выпадку з «Лакомкой», з якой бізнэсмен таксама хацеў зрабіць замежны фастфуд.

Па словах крыніцы, у снежні Юрый Марозаў прадаў свае акцыі ЗАТ «Крышталь» кампаніям ТАА «Мілкімпэкс» і СТАА «АЛС-Інвест». Яны ж звязаныя з саўладальнікам рэстарана «Друзья» і ўладальнікам франшызы Texas Chicken Віктарам Саўчуком. Адным з прадстаўнікоў гэтых кампаній таксама з'яўляецца вядомы спартыўны функцыянер, экс-дырэктар мінскага гандбольнага «Дынама» Міхаіл Маеўскі.

Новыя акцыянеры ўсё-такі дамагліся дазволу горада на адкрыццё на месцы крамы фастфуду, кажа суразмоўца. Ужо ў лютым гэтага года «Крышталь» стаў рассылаць усім партнёрам лісты аб рэарганізацыі.

Кіраўніцтва крамы сітуацыю ніяк не каментуе. Але ў ЖРЭА Цэнтральнага раёна, якому і належыць памяшканне, пацвярджаюць, што да восені на месцы крамы з'явіцца фастфуд. Але не амерыканскі, а беларускі.

— Кіраўніцтвам Мінгарвыканкама ўзгодненае пытанне аб перапрафіляванні і развіцці на месцы крамы сеткі грамадскага харчавання пад назвай «БульбаСтар». Гэта будзе сетка фастфуду з элементамі нацыянальнай беларускай кухні, — распавёў дырэктар ЖРЭА Цэнтральнага раёна Андрэй Рыбачонак. — На дадзены момант ЗАТ «Крышталь» заключыла дагавор з інжынернай кампаніяй і актыўна займаецца падрыхтоўкай праектна-каштарыснай дакументацыі для пачатку работ па рэканструкцыі памяшкання. Паралельна вырашаецца пытанне аб атрыманні дазволу ў Мінкульце, паколькі будынак мае статус гісторыка-культурнай каштоўнасці. Ужо былі апытаныя і прадастаўленыя спісы жыхароў дома, якіх апавяшчалі аб перапрафіляванні крамы — пакуль пытанняў тут не ўзнікла. Дакладных тэрмінаў, калі пачнуцца работы па рэканструкцыі памяшкання, няма — усё будзе рабіцца па меры ўзгаднення дазвольнай і праектнай дакументацыі. Магчыма, гэта адбудзецца ўжо ў красавіку. Адкрыць аб'ект грамадскага харчавання арыентыровачна плануюць у лістападзе.

Інфармацыю аб намеры новых уладальнікаў памяшкання адкрыць на месцы «Крышталя» беларускі фастфуд пацвердзіў і намеснік старшыні Мінгарвыканкама Андрэй Дамарацкі.

«Мінгарвыканкам і я асабіста заўсёды падтрымліваем стварэнне беларускага, нацыянальнага. Але пакуль гэта толькі канцэпцыя. Будзем глядзець, як яна будзе развівацца. Пры неабходнасці будзем дапамагаць, бо мы павінны ствараць альтэрнатыву замежнаму фастфуду», — сказаў ён.

У кампаніі «Мілкімпэкс» раскрываць падрабязнасці аб тым, што з сябе будзе ўяўляць беларускі фастфуд, адмовіліся.

• 0
• 0
• 0
• 0
• 0
• 0
• 0
• 0