Найлепшага футбольнага арбітра Афрыкі не пусцілі ў ЗША на чэмпіянат свету. Падвяло грамадзянства
За некалькі дзён да старту чэмпіянату свету па футболе ў ЗША ўзнік візавы скандал. Амерыканская іміграцыйная служба адмовіла ва ўездзе самалійскаму арбітру Амару Артану, які быў уключаны ФІФА ў спіс суддзяў турніру.
Як паведамляецца, Артан прыбыў у міжнародны аэрапорт Маямі з дыпламатычным пашпартам, аднак яму адмовілі ва ўездзе без тлумачэння прычын і адправілі зваротным рэйсам у Стамбул.
Артан стаў першым у гісторыі арбітрам з Самалі, які атрымаў прызначэнне на фінальную стадыю чэмпіянату свету. У 2025 годзе ён быў прызнаны найлепшым арбітрам Афрыкі паводле версіі Афрыканскай канфедэрацыі футбола (CAF) і судзіў фінальны матч афрыканскай Лігі чэмпіёнаў паміж клубамі «Пірамідс» з Егіпта і «Мамелодзі Сандаўнз» з ПАР.
Самалі ўваходзіць у пералік краін, грамадзяне якіх трапляюць пад амерыканскія візавыя абмежаванні. Нягледзячы на наяўнасць дыпламатычнага пашпарта, выключэнне для Артана, як паведамляецца, зроблена не было.
Раней з падобнымі цяжкасцямі сутыкнулася зборная Ірака. Яе нападнік Аймен Хусейн пасля прыбыцця ў Чыкага быў затрыманы для дадатковай праверкі. Паводле звестак прадстаўнікоў каманды, допыт доўжыўся каля сямі гадзін, пасля чаго футбалісту ўсё ж такі дазволілі ўезд.
У той жа час фатографу іракскай зборнай пашанцавала менш: пасля больш чым дзесяці гадзін праверкі яму адмовілі ва ўездзе і выслалі з краіны.
Праблемы з атрыманнем амерыканскіх віз узніклі і ў шэрагу прадстаўнікоў футбольнай зборнай Ірана, у тым ліку ў кіраўніцтва нацыянальнай федэрацыі.
Чэмпіянат свету па футболе 2026 года стартуе 11 чэрвеня ў ЗША, Канадзе і Мексіцы. Упершыню ў гісторыі ён праводзіцца адразу ў трох краінах, і ў ім зноў жа ўпершыню ўдзельнічаюць ажно 48 зборных.
Футбаліст зборнай Даніі Крысціян Эрыксан страціў прытомнасць пасярод матча з Украінай
ФІФА абавязала Іран і Егіпет правесці ЛГБТ-матч. Што там будзе?
На чэмпіянат свету па футболе едуць тры былыя гульцы першынства Беларусі
На беларускім тэлебачанні пакажуць матчы чэмпіянату свету па футболе
У двухразовага ўладальніка «Залатога мяча» — 4‑я стадыя раку. «Пакуль я яшчэ тут»
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка6
Каментары