Галоўным інжынерам будучай беларускай АЭС стаў расійскі спэцыяліст
Пра гэта паведаміў 19 жніўня на прэс-канферэнцыі ў Мінску інжынер дырэкцыі будаўніцтва АЭС Уладзімір Петрушкевіч.
Паводле яго слоў, у дырэкцыі новы спецыяліст працуе з 18 жніўня. «Ягоны стаж працы на атамных станцыях Расіі — прыблізна 25 гадоў, ён прайшоў усе пасады пачынаючы ад аператара», — падкрэсліў У. Петрушкевіч. Прадстаўнік дырэкцыі не стаў называць прозвішча і месца папярэдняй працы галоўнага інжынера будучай АЭС, адзначыўшы толькі, што ў найбліжэйшы час ён будзе прадстаўлены журналістам.
Паводле слоў Петрушкевіча, на адказныя пасады першага блока беларускай АЭС плануецца запрасіць 70—80 спецыялістаў з-за мяжы. «Да нас звяртаюцца шмат спецыялістаў. Для забеспячэння функцыянавання АЭС графік запрашэння людзей будзе ажыццяўляцца з апераджэннем будаўніцтва. Цяпер з імі ідуць перамовы», — сказаў прадстаўнік дырэкцыі.
Згодна з патрабаваннямі нарматыўных дакументаў, зазначыў Петрушкевіч, да 2014 года, не пазней як за два гады да ўводу станцыі ў эксплуатацыю (першы блок плануецца ўвесці ў 2016 годзе), павінен быць набраны ўвесь персанал АЭС. "Існуе графік апераджальнага набору, дзе па гадах, па розных этапах будаўніцтва вызначана, якія спецыялісты патрэбны для будучай АЭС», — сказаў інжынер дырэкцыі.
У. Петрушкевіч паведаміў, што для ўводу першага блока неабходна набраць 1,2 тыс. чалавек, а ўсяго на двух блоках беларускай АЭС будуць працаваць прыблізна 2 тыс. спецыялістаў.
Тым часам начальнік упраўлення вышэйшай і сярэдняй спецыяльнай адукацыі Міністэрства адукацыі Беларусі Юрый Міксюк паведаміў, што з новага навучальнага года каля 200 студэнтаў пачнуць навучанне ў галіне ядзернай энергетыкі.
Паводле яго слоў, з гэтай мэтай у беларускіх ВНУ адкрыты новыя спецыяльнасці і спецыялізацыі.
Цяпер чытаюць
Адпачынак для бясстрашных і беспрынцыповых: што цяпер з турамі з Беларусі ў Крым?8
Каментары