Як у Гомелі перасварыліся архітэктар, забудоўшчык, яўрэі, дзяржаўныя і незалежныя СМІ
Галоўная дзейная асоба — архітэктар і публіцыст Сяргей Ляпін паспрабуе абараніць гонар і годнасць пасля абраз на яго адрас, надрукаваных у «Гомельскай праўдзе». Газета, у сваю чаргу, пакрыўдзілася на фотаздымак Сяргея, дзё ён трымае адзін з нумароў над сметніцай. Трэцяя незадаволеная персона ў гэтай гісторыі — забудоўшчык, якому не спадабаліся матэрыялы актывіста.
Ногі гэтай справы растуць яшчэ з 2008 года. Тады пачалася спрэчка ўладаў і гісторыкаў Гомеля наконт тэрыторыі на вуліцы Сожскай: першыя разам з забудоўшчыкам захацелі выкарыстаць яе для ўзвядзення элітнага шматпавярховіка, другія да гэтага часу ўсімі намаганнямі спрабуюць даказаць, што гэтага рабіць нельга, бо ў ХVIII стагоддзі там знаходзіліся старыя габрэйскія могілкі.
Вясной будаўнічая кампанія ТАА «УКБ-Дронга» правяла на месцы раскопкі, на якіх прысутнічалі прадстаўнікі гарвыканкама і мясцовай габрэйскай суполкі. Па выніках быў складзены акт: усе пагадзіліся, што рэшткаў могілак на месцы знойдзена не было, і падпісалі яго. Будаўніцтву зноў далі старт, а актывістаў высмеялі: маўляў, нават яўрэі, якіх тэма тычыцца непасрэдна, ніякіх прэтэнзій да зямлі не маюць, а актывісты ніяк не супакояцца.
Аднак Сяргей Ляпін, кандыдат мастацтвазнаўства Яўген Малікаў ды іншыя актывісты Гомеля лічаць, што раскопкі тыя былі фіктыўнымі, а частка яўрэяў, што на іх прысутнічала, проста не хоча праблем з уладай.
Затое праблемы напаткалі саміх актывістаў. Пасля артыкула Сяргея «На скандальнай будоўлі на вуліцы Сожскай знойдзеныя косткі, але забудоўшчык іх не заўважае» яго пачалі цкаваць дзяржаўныя СМІ. Так, адзін з матэрыялаў аўтарства журналіста Рамана Старавойтава «Будаўнічыя аб'екты Гомеля пад прыцэлам інтэрнэт-правакатараў. Чаму не сядзіцца «ляпіным»?» змяшчае цытаты-параўнанні кшталту «акула пяра, якая спрытна маніпулюе грамадскай думкай і троліць практычна кожны рэалізаваны дзяржавай праект». За гэту і іншыя абразы Сяргей Ляпін і спрабуе праз суд выбіць прабачэнні ў «Гомельскай праўды».
Газета, у сваю чаргу, пакрыўдзілася на фотаздымак Сяргея, дзе ён трымае адзін з нумароў «ГП» над сметніцай, і падала зваротны пазоў. Да кампаніі пакрыўджаных далучылася і будаўнічая фірма, незадаволеная тым, як асвятлялі іх спробу пабудаваць жылы дом на месцы старых габрэйскіх могілак.
Усё гэта, мяркуе Сяргей, робіцца па замове зверху, каб прыструніць і яго, і самы паспяховы партал Гомельскай вобласці — «Моцныя навіны Гомеля». Менавіта на пляцоўцы «Моцных навін» Ляпін і іншыя гісторыкі друкавалі свае аргументы супраць будаўніцтва на Сожскай.
«Калі ў гэтай гісторыі панясе страту Gomel.today, будзе вельмі крыўдна. Спадзяюся, на справядлівы суд, які здолее ўбачыць, што праўда на нашым баку», — кажа Сяргей Ляпін.
«Наша Ніва» будзе трымаць у курсе развіцця падзей.
Чытайце таксама: З «Моцнымі навінамі Гомеля» судзяцца дзяржаўная газета і будфірма, Кузняцоў баіцца найгоршага
Цяпер чытаюць
Начальнік крымінальнага вышуку МУС бачыў прагулачны дворык СІЗА КДБ з акна свайго кабінета, а потым сам стаў вязнем3
Каментары