Эўразьвяз пашырыў санкцыі супраць Паўночнай Карэі — за яе ракетныя выпрабаваньні.
10 жніўня Эўрапейская Рада абвясьціла пра ўнясеньне ў санкцыйны сьпіс яшчэ 9 грамадзян КНДР і чатырох устаноў, уключаючы паўночнакарэйскі дзяржаўны Зьнешнегандлёвы банк.
У «чорным сьпісе» ЭЗ цяпер 41 паўночнакарэйскі грамадзянін і 7 установаў.
У прэс-рэлізе Эўрапейскай Рады падкрэсьліваецца, што Эўразьвяз выконвае ўсе рэзалюцыі Рады Бясьпекі ААН, прынятыя ў адказ на разьвіцьцё КНДР ядзерных узбраеньняў, іншых відаў зброі масавага зьнішчэньня і балістычных ракетаў. Акрамя таго, ЭЗ уводзіць асобныя абмежавальныя захады супраць Пхэньяну.
5 жніўня Рада Бясьпекі ААН аднагалосна ўхваліла ўзмацненьне санкцый супраць Паўночнай Карэі ў адказ на яе выпрабаваньні міжкантынэнтальных балістычных ракетаў. Пхэньян не прыняў рашэньня міжнароднай супольнасьці, заявіўшы, што яно парушае яго сувэрэнітэт.
Каментары