Трамп прымае вялікую дозу аспірыну для разрэджвання крыві. Праз гэта ў яго лёгка з'яўляюцца сінякі
79‑гадовы Дональд Трамп расказаў пра сваё здароўе ў інтэрв'ю The Wall Street Journal.
Трамп заявіў, што ў яго шмат энергіі і што ён звязвае гэта са сваімі бацькамі. «Генетыка — гэта вельмі важна, — сказаў ён. — І ў мяне вельмі добрая генетыка».
Трамп прымае больш аспірыну, чым рэкамендуюць яго дактары. Ён нядоўгі час спрабаваў насіць кампрэсійныя шкарпэткі з-за ацёкаў шчыкалатак, але кінуў, бо яны яму не спадабаліся.
Часам ён ігнаруе парады сваіх лекараў і з пагардай ставіцца да агульнапрынятых медыцынскіх рэкамендацый, спадзеючыся на тое, што ён называе сваёй «добрай генетыкай».
Акрамя гольфа, Трамп не займаецца рэгулярнымі фізічнымі практыкаваннямі, і вядома, што ён ужывае шмат салёнай і тлустай ежы, такой як гамбургеры і бульба фры.
Вялікая доза аспірыну, якую ён вырашыў прымаць штодня, прывяла да таго, што ў яго лёгка з'яўляюцца сінякі. Дактары заклікалі яго перайсці на меншую дозу, але Трамп адмовіўся, бо прымае яго ўжо 25 гадоў.
«Кажуць, аспірын карысны для разрэджвання крыві, а я не хачу, каб праз маё сэрца цякла густая кроў, — сказаў Трамп. — Я хачу, каб праз маё сэрца цякла добрая, рэдкая кроў. Гэта ж лагічна?»
Трамп адмаўляе, што мае праблемы са слыхам. Ён таксама адмаўляе, што засынаў на нядаўніх мерапрыемствах у Белым доме, і заявіў, што яму заўсёды хапала малой колькасці сну.
Скура Трампа настолькі далікатная, што Пэм Бондзі, якая цяпер з'яўляецца яго генеральным пракурорам, параніла яму руку пярсцёнкам, калі пляснула яго па далоні («дала пяць») на з'ездзе Рэспубліканскай партыі ў Мілуокі.
Ультрагукавое даследаванне вен паказала, што ў прэзідэнта «хранічная вянозная недастатковасць». Трамп сказаў, што стаў больш уставаць з-за стала і хадзіць, што таксама дапамагае пры ацёках.
Але ён не цікавіцца фізічнымі практыкаваннямі, акрамя гольфа. «Мне гэта проста не падабаецца. Гэта сумна, — сказаў Трамп. — Хадзіць па бегавой дарожцы ці бегаць па ёй гадзінамі, як гэта робяць некаторыя людзі — гэта не для мяне».
Трамп прымае лекі для кантролю ўзроўню халестэрыну і выкарыстоўвае крэм для лячэння скуры.
Прэзідэнт дрэнна спіць па начах і, па яго ўласных словах, часта піша паведамленні і тэлефануе памочнікам у 2 гадзіны ночы ці пазней.
Сон з'яўляецца асаблівай праблемай на борце Air Force One, дзе Трамп не дае спаць сваім дарадцам. Старшыя супрацоўнікі па чарзе сядзяць з ім падчас доўгіх пералётаў. Прэзідэнт вядомы тым, што кпіць з памочнікаў, якія засынаюць.
Цяпер чытаюць
Брат беларускай каралевы прыгажосці трапіў у рэанімацыю ў Азербайджане4
Каментары