Адміністрацыйны кодэкс, уведзены з 1 сакавіка 2007 году, прывёў да ўсплёску колькасьці адміністрацыйных парушэньняў на 43 %. Вярхоўны суд унёс на разгляд зьмены, пакліканыя спрасьціць няўдалае заканадаўства.
Новы Адміністрацыйны кодэкс, уведзены з 1 сакавіка 2007 году, прывёў да ўсплёску колькасьці адміністрацыйных парушэньняў на 43 %. Вярхоўны суд унёс на разгляд зьмены, пакліканыя спрасьціць няўдалае заканадаўства.
У краіне назіраецца ўсплёск адміністрацыйных правапарушэньняў. За першае паўгодзьдзе сёлета іх зарэгістравана 188 тысяч, што на 43 % болей, чым за аналягічны прамежак часу летась.
Пра гэта на сёньняшняй прэс-канфэрэнцыі паведаміў старшыня Вярхоўнага суду Валянцін Сукала.
Акурат з прычыны пастаяннага росту адміністрацыйных справаў Вярхоўны суд распрацаваў і ўнёс на разгляд зьмены, якія накіраваныя на спрашчэньне Адміністрацыйнага кодэксу. Калі зьмены будуць падтрыманыя парлямэнтам, то склад Адміністрацыйнага кодэксу можа быць зьменшаны на 20 %. В.Сукала кажа, што, напрыклад, у выпадку зьдзяйсьненьня дробнага хуліганства, калі чалавек прызнае сваю віну, то суд можа адбывацца ў ягоную адсутнасьць. Будзе спрошчаная таксама сыстэма складаньня пратаколаў.
Паводле В. Сукалы,
з прычыны вялікай колькасьці адміністрацыйных справаў павялічваецца напружанасьць і інтэнсіўнасьць працы судзьдзяў. Калі летась штомесяц судзьдзя ў сярэднім разглядаў 63 справы, то сёлета ўжо 76,2.
Павелічэньне на 11 % справаў грамадзянскіх старшыня Вярхоўнага суду разглядае як пазытыўную тэндэнцыю, бо людзі давяраюць правасудзьдзю. 40 % грамадзянскіх справаў — гэта сямейныя спрэчкі, затым ідуць жыльлёвыя, зямельныя, працоўныя спрэчкі. Толькі 30 % грамадзянскіх справаў па аднаўленьні на працу сканчваюцца станоўча.
Як адзначыў старшыня Вярхоўнага суду, паводле сацыялягічных апытаньняў па даверы суды знаходзяцца на чацьвёртым месцам, адразу за прэзыдэнтам, царквой і арміяй.
Са станоўчых тэндэнцый В. Сукала зазначае павелічэньне апэратыўнасьці правасудзьдзя. Калі летась было адкладзена з розных прычын 1500 справаў, то сёлета толькі 1012. Затое дысцыплінарныя спагнаньні ў 2008 годзе атрымалі 40 судзьдзяў. Год назад было 29.
З нэгатыўнага – нізкая якасьць крымінальнага правасудзьдзя. Сёлета ўжо адмяняўся 351 прысуд, што складае 0,9 % ад агульнай колькасьці. 419 справаў было спынена, 79 чалавек апраўдана, 11 — неабгрунтавана асуджаныя. Галоўнай прычынай такой зьявы называецца няякасны аналіз матэрыялаў справы падчас папярэдняга сьледзтва.
Вярхоўны суд працягвае настойваць на зьмяншэньні колькасьці асуджаных да пазбаўленьня волі, калі гэта тычыцца няцяжкіх злачынстваў (88 % ад агульнай колькасьці злачынстваў). Стрымліваючымі фактарамі тут зьяўляецца вялікая колькасьць рэцыдывістаў сярод асуджаных, а таксама абставіны зьдзяйсьненьня злачынства(найчасьцей п’яны стан).
Валянцін Сукала паведаміў, што з нагоды 65-годзьдзя вызваленьня Беларусі ад фашыстоўскіх захопнікаў у краіне рыхтуецца чарговая амністыя. Вярхоўны суд заўсёды быў супраць штогадовых амністый, але цяпер ягоная пазыцыя зьмянілася. Сукала лічыць, што на гэты раз «амністыя павінна быць шырэйшая, чым мінулыя разы». Найперш гэта зьвязана з «важнасьцю даты».
Каментары