Расіянку, якая згубіла дакументы пры вылеце рэйсам Мінск — Кіеў, украінскія памежнікі абвінавацілі ў правозе наркотыкаў і адправілі яе ў Беларусь. Беларускія памежнікі засумняваліся ў праўдзівасці гісторыі, паведамляе Tut.by.
«Памежнікі ў міжнародным аэрапорце «Барыспаль» затрымалі грамадзянку Расіі, у якой у асабістых рэчах знайшлі наркатычнае рэчыва. Жанчына прыбыла рэйсам Мінск — Кіеў. Прайшоўшы на пашпартны кантроль, яна не дала дазваленчых дакументаў для перасячэння дзяржаўнай мяжы: сказала, што дакументы нібыта згубіла ў самалёце», — распавялі ў Дзяржпамежслужбе Украіны.
У ведамстве адзначылі, што падчас гутаркі ў расіянкі назіраліся прыкметы наркатычнага ап'янення. Памежнікам яна паведаміла, што ёй 37 гадоў, яна грамадзянка Расіі і прыбыла ва Украіну працаваць ў адной з кампаній па продажы квіткоў.
«У далейшым, у ходзе праверкі, службовы сабака, натрэніраваны на выяўленне наркатычных рэчываў, спрацаваў на сумачку расіянкі. У ёй памежнікі знайшлі два скруткі ў фальзе з рэчывам белага колеру. Па дадзеным факце праінфармаваныя супрацоўнікі Нацпаліцыі», — гаворыцца ў паведамленні ведамства.
Пазней высветлілася, што жанчыну ніхто не затрымліваў і яе адправілі назад у Мінск.
«Гэтую грамадзянку Расіі ўкраінскі бок вярнуў на тэрыторыю Беларусі зваротным рэйсам 20 верасня па прычыне адсутнасці неабходных дакументаў, якія даюць права на перасячэнне мяжы. Ніякіх дакументальных доказаў, якія пацвярджаюць выяўленне ў яе наркатычных сродкаў, аб якіх заявіў украінскі бок, прадстаўлена не было», — пракаментаваў сітуацыю афіцыйны прадстаўнік Дзяржаўнага пагранічнага камітэта Беларусі Антон Бычкоўскі.
Ён адзначыў, што спроба незаконнага перамяшчэння наркотыкаў праз мяжу ў любай дзяржаве цягне за сабой распачацце крымінальнай справыі затрыманне падазраванага, а украінскімі калегамі гэта зроблена не было.
«У сувязі з гэтым дадзенае сцвярджэнне лагічна выклікае сумневы. Як патлумачыла сама грамадзянка Расіі, свае дакументы яна згубіла пры вылеце з Нацыянальнага аэрапорта «Мінск» непасрэдна пасля памежнага кантролю, бо раней без усялякіх праблем прайшла афармленне на вылет», — дапоўніў Антон Бычкоўскі.
Атрымаць аператыўны каментар у прэс-службе Дзяржпамежслужбы Украіны не ўдалося.
Цяпер чытаюць
Лукашэнка: Абмяркоўваем з ЗША вызваленне палітвязняў18
Каментары