Мінабароны не каментуе «дакументы» пра планы размяшчэння ў Беларусі расійскай ракетнай брыгады
У разгар падзей шпіёнскага скандала з украінскім журналістам Паўлам Шаройкам, іншы ўкраінскі журналіст і вайсковы аналітык Дзмітрый Тымчук выклаў у фэйсбуку паперы, з якімі нібыта і затрымалі Шаройку.
Паводле Тымчука, гэтыя паперы Шаройку меўся перадаць нейкі журналіст расійскага НТВ: яны выдаюцца за ўнутраны дакумент Міністэрства абароны Беларусі па выніках вучэнняў «Захад-2017».
У прыватнасці, у ім вядзецца гаворка пра задачы намеснікам міністра і кіраўніка Генштаба, але ніякіх сакрэтных звестак не прагледжваецца.
Адзінае, што чапляе вока, — гэта нібыта існуючыя планы па падрыхтоўцы інфраструктуры ў двух вайсковых гарадках «Цэль» і «Асаўцы» для размяшчэння там у 2018 годзе расійскай ракетнай брыгады і батальёна РЭБ (радыёэлектроннай барацьбы), а таксама задача намесніку начальніка Генштаба «прапрацаваць і ўзгадніць з расійскім бокам пытанні ўзмацнення складу сіл і сродкаў разведкі Узброеных сілаў Расіі на тэрыторыі Беларусі з улікам магчымага сталага размяшчэння».
Адкуль той «сакрэтны дакумент» у Тымчука? Невядома, на гэтае пытанне ён не адказвае.
Наколькі можна яму верыць? Няўжо ў нас маюць з'явіцца нейкія расійскія базы?
У Міністэрстве абароны гэтыя паперы не каментуюць.
«Так і запішыце, я гэта не каментую», — сказаў нам прэс-сакратар Уладзімір Макараў.
Але большасць экспертнай супольнасці мяркуе (у прыватнасці, сам Тымчук), што паперы, выдадзеныя за «сакрэтны дакумент», насамрэч фэйк.
«Гэта адназначна фэйк, — сказаў нам і Аляксандр Алесін. — Прычым разлічаны не на беларускую аўдыторыю, а на ўкраінскія спецслужбы, якія вельмі балюча рэагуюць на ўсялякія звесткі і намёкі пра вайсковую прысутнасць Расіі ў Беларусі. Гэта такі «кручок». Бо ўпэўнена можна казаць, што Лукашэнку ніякія базы, тым больш — ракетная брыгада і батальён РЭБ не патрэбны. Таму што гэта адразу ж ставіць кропку на ўсіх нашых адносінах з Захадам. Бо што такое ракетная брыгада? Гэта «Іскандэры», што трактуецца як зброя нападзення. Зыходзячы з палітычнай сітуацыі і неаднаразовых заяваў Лукашэнкі, акрэсленыя ў гэтых паперах планы немагчымыя».
Цяпер чытаюць
Вынеслі прысуд Паліне Зыль — блогерцы, якая стала нулявым пацыентам справы Гаюна, бо ў яе знайшлі тую самую спасылку ад Матолькі15
Каментары