Аглядальнік расійскага выдання «Росбалт» Дзмітрый Травін лічыць, што ў расійскага прэзідэнта ёсць толькі адзін спосаб падняць свой рэйтынг і застацца пры ўладзе яшчэ на доўгія гады.
Аглядальнік «Росбалта» звяртае ўвагу, што рэйтынг Пуціна ўпаў на дакрымскі ўзровень. У мінулы раз, калі фіксаваўся нізкі рэйтынг, была арганізавана экстраная аперацыя ў Крыме. Паўвостраў далучылі да Расіі — і рэйтынг узляцеў да нябёсаў. Што зробіць Пуцін зараз?
Першае, што прыходзіць у галаву, — далучэнне Данбаса, піша Травін. Аднак ён думае, што такім простым шляхам Крэмль не пойдзе. Тэрыторыя ўсходняй Украіны разбураная і разрабаваная ваенным канфліктам, і Расіі яна не патрэбна. Акрамя таго, Данбас, па сутнасці, даўно ад Украіны адкалолі. Далучэнне праблемнага Данбаса не падыме рэйтынг Пуціна высока.
Далучэнне Абхазіі, Паўднёвай Асеціі ці Прыднястроўя выкліча новыя санкцыі з боку Захаду, і таксама не будзе ўспрынята расійскім абывацелем як нешта эпахальнае.
Па-сапраўднаму моцнай акцыяй стала б ўварванне ў адну з краін НАТА. Аднак падобны варыянт «Росбалт» цалкам выключае.
«У Крамля ёсць толькі адзін аптымальны варыянт падтрымкі рэйтынгу і адначасова — рашэння праблемы-2024 (г.зн. захавання вышэйшай улады ў руках Пуціна пасля заканчэння яго чацвёртага тэрміну). І звязаны гэты варыянт з Беларуссю»,
— піша Травін.
Аўтар звяртае ўвагу, што ў Расіі з Беларуссю даўно ўжо існуе саюзная дзяржава, якая «спіць». Але рэанімаваць гэтую хімеру цалкам магчыма. Прычым для гэтага не патрэбны радыкальныя крокі.
Травін апісвае наступны сцэнар. Унутры органаў кіравання Расіі і Беларусі ўсё захаваецца па-ранейшаму. Застануцца два прэзідэнты (напрыклад, Лукашэнка і Мядзведзеў), два парламенты, два ўрады, якія займаюцца традыцыйна гаспадарчымі пытаннямі. Але ўсе сілавыя і праваахоўныя органы перападпарадкуюць саюзнаму кіраўніцтву. І на саюзным узроўні ўвядуць новую пасаду. Напрыклад, генеральны сакратар Саюзнай дзяржавы Расіі і Беларусі. Гэтую пасаду зойме, натуральна, Пуцін.
Аўтар «Росбалта» ўпэўнены, што ў гэтым выпадку рэйтынг Пуціна зноў узляціць, і ён лёгка выйграе выбары.
«Рускія будуць шчаслівыя, паколькі Беларусь відавочна большая за Крым. Сярод беларусаў нацыянальны рух даўно самім Бацькам задушаны, значыць, сур'ёзных пратэстаў чакаць не даводзіцца»,
— піша Травін.
Аўтар упэўнены, што Захад вымушаны будзе змірыцца з такім сцэнарам.
Чытайце таксама:
Фонтанка: Расія — імперская краіна. І беларускае пытанне ёй прыйдзецца рана ці позна вырашаць
Уладзіслаў Іназемцаў: Для падтрымання патрыятычнага чаду Расіі трэба акупаваць цяпер цэлую краіну. І кандыдат тут толькі адзін
Цяпер чытаюць
Беларус паляцеў у Ніцу праз Стамбул — цяпер ён у коме ў французскай бальніцы. Мясцовыя медыкі раяць адключаць яго5
Каментары