Спінеры ўжо не ў модзе, цяпер усе хочуць сабе попсокеты. Што гэта і хто карыстаецца імі ў Беларусі?
Зусім нядаўна ўсе навокал хадзілі і круцілі спінеры, цяпер усё большую папулярнасць здабывае аксэсуар для мабільнікаў пад назвай попсокет.
Попсокеты — гэта пластыкавыя трымальнікі для смартфонаў і планшэтаў, якія мацуюцца на заднюю панэль. Гэта нібыта ручка-падстаўка, якая раскладваецца, калі тэлефон трэба трымаць у руцэ ці паставіць на стол, і складваецца, калі неабходна несці яго ў кішэні. Мацуецца да смартфона попсокет пры дапамозе клейкай стужкі, хапае яе ў сярэднім на 10 пераклейванняў.
Вынаходніцтвам гэтай прылады мы абавязаныя амерыканцу Дэвіду Барнэту, заснавальніку кампаніі PopSockets. Цікава, што першапачаткова ён не задумваў попсокеты як трымальнікі, ён проста хацеў прыдумаць нешта, за што можна было б зачэпліваць навушнікі ад тэлефона, каб яны не блыталіся. Аднойчы ён прыляпіў на свой айфон дзве кнопкі ад адзення і пачаў абгортваць вакол іх навушнікі. Так з яго жыцця знікла праблема іх вечнага распутвання.
У 2012 годзе Дэвід зрабіў са свайго вынаходніцтва стартап: пасля дзясяткаў прататыпаў мужчына, нарэшце, распрацаваў форму сённяшніх попсокетаў. Каб выпусціць першую партыю, частку грошай пазычыў у сяброў, другую — сабраў пры дапамозе краўдфандынгу. За 2017 год кампанія PopSockets прадала больш за 35 мільёнаў «трымалак» па ўсім свеце. Імі карыстаюцца многія зоркі: Джарэд Лета, Сэрэна Уільямс ды іншыя.
Навошта яны патрэбныя?
У ЗША і Еўропе попсокеты з большага набываюць уладальнікі вялікіх смартфонаў: з «трымалкай» імі прасцей карыстацца, рука не напружваецца, зніжаецца рызыка ўпусціць мабільнік пры рэзкім штуршку. Таксама попсокеты выкарыстоўваюць у якасці падстаўкі падчас праглядаў відэа ці фільмаў. Для іншых жа фанатаў гэта проста прыгожы аксэсуар: на попсокетах друкуюцца цікавыя карцінкі з вядомымі персанажамі і жывёламі.
Ці папулярныя аксэсуары ў Беларусі?
Дырэктар афіцыйнага прадстаўніка кампаніі PopSockets у Беларусі Зміцер распавёў «НН», што калі ў ЗША попсокеты набываюць, у асноўным, дарослыя, то ў Беларусі яны карыстаюцца найбольшым попытам у школьнікаў. Але наглядзеўшыся на тэлефоны з попсокетамі ў дзяцей, іх бацькі таксама заказваюць сабе такога дапаможніка.
«Мы першымі прывезлі попсокеты ў Беларусь прыблізна год таму, і калі былі адзінымі на рынку, у месяц маглі прадаць 250—300 аксэсуараў. Цяпер канкурэнцыя стала вялікай, таму продажы знізіліся, але, мяркуючы па запытах у гугл, іх папулярнасць толькі расце», — кажа Зміцер.
Часцей за ўсё набываюць попсокеты касмічнай тэматыкі, а таксама з коткамі, сабакамі і аднарогамі.
Каментары