Вальфовіч пра атаку дронам аўтобуса з дзецьмі ў Бранскай вобласці: Мэта была сутыкнуць Беларусь з Украінай
Дзяржаўны сакратар Рады бяспекі Аляксандр Вальфовіч назваў мэту атакі на аўтобус з беларускімі дзецьмі і дадаў, што Беларусь «уцягнуць у канфлікт не ўдасца».
Па справе аб удары дрона па аўтобусе з беларускімі дзецьмі ў Бранскай вобласці апытаны ўсе сведкі. Пра гэта заявіў журналістам дзяржаўны сакратар Савета бяспекі Аляксандр Вальфовіч пасля ўскладання кіраўніцтвам сілавых структур кветак на плошчы Перамогі ў Мінску, прысвечанага Дню ўсенароднай памяці ахвяр Вялікай Айчыннай вайны.
Аляксандр Вальфовіч нагадаў, што на мінулым тыдні ў Бранскай вобласці адбыўся ўдар БПЛА па аўтобусе з дзецьмі з Беларусі.
«Не важна, чый гэта аўтобус — беларускі, расійскі ці нейкай іншай дзяржавы. Гэта аўтобус з мірнымі жыхарамі. Але той, хто здзейсніў гэты ўдар, спрабаваў стварыць нагоду для таго, каб сутыкнуць Беларусь з Украінай, справакаваць нейкую дрэнную сітуацыю», — заявіў дзяржсакратар.
Ён указаў на тое, што Лукашэнка трымае сітуацыю «на самым жорсткім кантролі» і даў адпаведныя даручэнні.
«Нашы спецслужбы, Следчы камітэт праводзяць самае дбайнае расследаванне. Усе факты будуць прааналізаваны. Ужо апытаны ўсе сведкі і тыя, хто быў у аўтобусе.
Ёсць ужо пэўныя, скажам так, моманты, пра якія будзе паведамлена кіраўніку дзяржавы. Рашэнне будзе прынята. Але ўцягнуць Беларусь у канфлікт не атрымаецца. Мы за мір, разважлівасць, за вырашэнне ўсіх пытанняў дыпламатычным шляхам», — падкрэсліў Аляксандр Вальфовіч.
На мінулым тыдні Лукашэнка заявіў, што дрон меў украінскае паходжанне, аднак даручыў Саўбезу правесці ўласнае незалежнае даследаванне і «дакапацца да ісціны», паколькі вакол інцыдэнту гучыць шмат супярэчлівых версій. Кіеў абвясціў атаку расійскай правакацыяй і адмаўляе датычнасць да здарэння.
У дзяржаўных СМІ і каналах Беларусі пасля інцыдэнту з аўтобусам была развязаная кампанія па распальванні нянавісці да Украіны і Захаду. Заяваў украінскага боку не прыводзілася.
Цяпер чытаюць
У 2020 годзе ябацька Аміна «актыўна галасавала» за Лукашэнку. А цяпер не разумее, чаму родная маці на яе данесла, а міліцыя затрымала35
Каментары