Інга Ругінене пакіне пасаду прэм’ер-міністра і вернецца ў Міністэрства сацыяльнай абароны і працы, якое яна ўзначальвала да таго, як стала кіраўніцай урада, піша LRT.
«Я хачу вярнуцца туды, дзе заўсёды было маё сэрца. Я разглядаю гэта як натуральную ратацыю і вельмі важны этап у маім жыцці. Калі я была патрэбна ў цяжкі момант, я не пабаялася ўзяць на сябе адказнасць. А сёння я адчуваю сябе спакойна», — сказала Ругінене ў інтэрв’ю, апублікаваным у суботу ў LRT.
Так яна адказала на пытанне, ці разглядае яна будучыя змены як натуральную палітычную ратацыю або як крок назад.
«У мяне ёсць магчымасць вярнуцца туды, дзе я магу быць найбліжэй да людзей і пытанняў, якія заўсёды былі для мяне самымі важнымі», — адзначыла палітык.
Ругінене займала пасаду міністра сацыяльнай абароны і працы ва ўрадзе Гінтаўтаса Палуцкаса. Пасля яго адстаўкі 25 верасня мінулага года Ругінене заняла пасаду прэм’ера.
Сярод найважнейшых рашэнняў на пасадзе прэм’ера Ругінене назвала выдачу фінансавання для абароннай сферы ў памеры 5,38% ВУП краіны, узмацненне супрацьпаветранай абароны і барацьбу з кантрабандай цыгарэт з дапамогай метэазондаў.
Прэм’ерка адзначыла, што цяпер зрабіла б некаторыя рэчы інакш, але не шкадуе, што ўзначаліла ўрад.
Верагодна адказнасць за кіраўніцтва ўрадам возьме на сябе лідар Сацыял-дэмакратычнай партыі Літвы Міндаўгас Сінкявічус.
Плануецца, што кабінет міністраў падасць у адстаўку 23 чэрвеня пасля таго, як сацыял-дэмакраты вырашылі замяніць у кіроўнай большасці партыю «Зара над Нёманам» на Саюз дэмакратаў «У імя Літвы».
Цяпер чытаюць
Арыштаваны сенатар Карпіцкі, галоўны доктар Брэсцкай абласной бальніцы7
Каментары