Расійскі навукоўца плануе правесці небяспечны эксперымент са зменай генаў у дзяцей
Біёлаг з Расіі Дзяніс Рэбікаў заявіў пра свае намеры паўтарыць эксперымент з рэдагаваннем генома ў дзяцей. Раней навуковая супольнасць асудзіла кітайскага спецыяліста, які без дазволу выдаліў адзін з генаў у двух эмбрыёнаў чалавека, піша Nature.
У канцы 2018 кітайскі біёлаг Хе Цзянькуй заявіў пра нараджэнне першых дзяцей са змененым геномам. З дапамогай методыкі CRISPR Цзянькуй выдаліў у двух эмбрыёнаў ген CCR5, што, паводле яго слоў, зрабіла дзяўчынак-блізнят устойлівымі да ВІЧ.
Як і кітайскі калега Хе Цзянькуй, Рэбікаў плануе адключыць ген CCR5. Самі эксперыментальныя эмбрыёны будуць падсаджаныя ВІЧ-пазітыўным жанчынам, якія не рэагуюць на стандартную ў выпадку цяжарнасці тэрапію.
Навукоўцы ў Расіі плануюць падысці да эксперыменту больш адкрыта, чым кітайцы, якія паведамілі пра вынікі толькі пасля таго, як дзеці нарадзіліся.
Навуковая супольнасць лічыць такія эксперыменты не зусім этычнымі: нельга проста ўзяць і падсадзіць жанчыне адрэдагаваны эмбрыён, нават калі яна згодная. Калі дзіця народзіцца і вырасце, генетычныя змены будуць перададзеныя наступным пакаленням — гэта сур'ёзнае ўмяшанне, якое ў біялогіі называецца змяненнем зародкавай лініі.
Асцярогі таксама звязаны і з тым, што тэхналогія можа выклікаць у эмбрыёна непрадбачаныя мутацыі.
«Я думаю, што я досыць звар'яцелы для таго, каб зрабіць гэта», — распавёў Рэбікаў часопісу Nature.
Цяпер чытаюць
Мабільным аператарам забаранілі заганяць беларусаў у вялікі мінус8
Каментары