У цэнтры Баранавічаў пачалі зносіць пасляваенны квартал драўлянай забудовы
Драўляныя дамы колішняга ведамаснага квартала былі прызнаныя непрыдатнымі для пражывання і зносяцца дзеля новага камерцыйнага будаўніцтва.
Пра пачатак разбору драўлянага двухпавярховіка па вуліцы Міцкевіча, 5 паведаміла раённая газета «Наш край». Работы ініцыявала мясцовая жыллёва-рамонтная эксплуатацыйная ўправа на падставе рашэння Брэсцкага аблвыканкама ад 2008 года, паводле якога брусчатыя дамы з пячным ацяпленнем прызналі неадпаведнымі санітарным нормам.
Ведамасны квартал у межах вуліц Міцкевіча і Гагарына фармавалі пяць аднолькавых васьмікватэрных двухпавярховых дамоў, узведзеных у 1947—1949 гадах. Паводле звестак краязнаўцаў, на гэтай будоўлі выкарыстоўвалі працу ваеннапалонных мясцовага лагернага аддзялення № 183, якія пасля вайны таксама аднаўлялі чыгуначную інфраструктуру горада.
Канструктыўна будынкі ўяўляюць сабой брусчатыя зрубы, ашаляваныя звонку дошкай і пафарбаваныя ў зялёны колер. Фасады вылучаліся прамавугольнымі ліштвамі, разьбянымі міжпавярховымі карнізамі і фігурнымі кранштэйнамі, якія трымаюць навісі над уваходамі. Унутры захоўвалася аўтэнтычная планіроўка: вузкія калідоры з выхадам на невялікія кухні, шырокія драўляныя лесвіцы з балясінамі і кафляныя печы сярэдзіны XX стагоддзя.
Да жылых дамоў прылягаў гаспадарчы двор з драўлянымі павецямі, прызначанымі для захоўвання дроваў і вугалю. Гэтыя гаспадарчыя пабудовы камунальныя службы цалкам знеслі на працягу 2024—2026 гадоў.
Зямля пад кварталам мае афіцыйны статус інвестыцыйнай пляцоўкі. Першым на гэтай тэрыторыі зруйнавалі дом нумар 1 на скрыжаванні вуліц Міцкевіча і Савецкай, дзе пазней адкрылі рэстаран хуткага харчавання «Мак.by».
Дом нумар 5 стаў другім разабраным жылым аб'ектам ансамбля. Цяпер на пляцоўцы застаюцца два будынкі — па вуліцы Міцкевіча, 3 і Гагарына, 55. Жыхароў адтуль ужо адсялілі, аднак частка ўласнікаў пакуль не завяршыла юрыдычнае афармленне дакументаў на пераход правоў уласнасці на новае жыллё.
Паводле інфармацыі кіраўніцтва тэхнічнага аддзела Баранавіцкага ЖРЭУ, абодва пакінутыя дамы таксама прызначаныя пад знос і будуць ліквідаваныя адразу пасля закрыцця ўсіх юрыдычных пытанняў з былымі жыхарамі.
Ніводзін з будынкаў квартала не мае статусу гісторыка-культурнай каштоўнасці і не ахоўваецца дзяржавай.
Цяпер чытаюць
Што вядома пра віцебчука, якога вінавацяць у спробе падрыву самалёта ў Германіі16
Каментары