На ўрачыстым сходзе, прысвечаным Дню Незалежнасці, Аляксандр Лукашэнка пракаментаваў спрэчкі вакол «закона аб адтэрміноўцы ад арміі». Лукашэнка скарыстаў з гэтай нагоды, каб выказацца супраць уступлення Беларусі ў склад Расіі.
Паводле Лукашэнкі, у інтэрнэце бурна абмяркоўваюцца некалькі тэмаў, у тым ліку папраўкі ў законы, якія тычацца службы ў войску.
«Бедны міністр абароны Раўкоў: яго стапталі ўжо ўздоўж і ўпоперак — не тое прапанаваў, не тое вайскоўцы ўнеслі на разгляд парламента, а тыя нешта там прынялі, а заўтра будзе катастрофа. Дык супакойцеся», — заклікаў Лукашэнка.
Праціўнікі новага закона, адзначыў Лукашэнка, у сваіх каментарах у інтэрнэце прапануюць падзяліць грамадства на нейкія класы: адны, простыя грамадзяне, будуць абараняць краіну, а іншыя — працаваць, атрымліваць адукацыю, жыць за мяжой, але не ваяваць за Радзіму.
«Я як прэзідэнт, абдумваючы падкінутую тэму, пачынаю разважаць, мне ж закон падпісваць: а якія ёсць варыянты, акрамя тых, якія прапісаныя ці будуць прапісаныя ў законе?»
Паводле Лукашэнкі, ёсць некалькі магчымых варыянтаў вырашэння сітуацыі. Адзін з іх — звярнуцца па абарону ў NATO.
«Калі мы моцна папросім, яны нам паабяцаюць. І тыя, якія папісваюць у інтэрнэце, з задавальненнем бы гэта прынялі. Вы хочаце гэтага варыянту? Я — не».
Іншы магчымы варыянт тычыцца ўваходжання Беларусі ў склад Расіі.
«Мы можам папрасіць, каб яны нас абаранялі, — ядзерны парасон, гіпергукавая зброя ды іншае. Можам папрасіць і дамовіцца. Я думаю, па меншай меры, на першым часе, для нашага пакалення хопіць, добра там дзеці — самі хай разбіраюцца потым, — саркастычна заўважыў кіраўнік дзяржавы.
— Вы хочаце ў склад Расіі, каб яна нас абараніла? Не. І я не хачу», — цытуе кіраўніка краіны БелТА.
Аляксандр Лукашэнка падкрэсліў, што для беларусаў застаецца варыянт: самім абараняць сябе.
«І тыя, хто папісваюць, так і разважаюць, толькі думаюць, што не яны будуць са стрэльбай хадзіць ад Брэста да Смаленска, не яны будуць на бронетэхніцы, у самалётах лятаць, абараняючы нашу краіну, а тыя, якія не могуць нікуды паступіць і так далей. Вы хочаце, каб было так? Я — не. Пасля мяне — на здароўе», — сказаў Лукашэнка.
Цяпер чытаюць
Гістарычныя +40,4°C у Пінску — гэта толькі разагрэў. Беларусь уваходзіць у новую кліматычную эру і на вачах стане лесастэпам8
Каментары