Мілінкевіч зарэгістраваў у Польшчы «Вольны беларускі ўніверсітэт»
Установа зарэгістравана ў Варшаве.
«Атрымаць рэгістрацыю было не складана, — распавёў экс-кандыдат у прэзідэнты і былы лідар руху «За свабоду» ў інтэрв'ю «Беларускаму партызану». — Фонд, які мы зарэгістравалі, называецца «Вольны беларускі ўніверсітэт». Але для таго, каб усё пачало працаваць, неабходна вялікая падрыхтоўчая праца. У нас звычайны ўніверсітэт вельмі складана запусціць. Пяць гадоў трэба мінімум, каб яго раскруціць, а гэты яшчэ складаней».
Установа зарэгістравана ў Варшаве.
«Мы хацелі зарэгістраваць універсітэт менавіта на тэрыторыі Еўрасаюза. У прынцыпе, можна было і тут спрабаваць. Можа, і дазволілі б. Але тое, што мы хочам рабіць, на тэрыторыі Беларусі падлягае ліцэнзаванню, а гэта значыць, што змест адукацыі, па сутнасці, будзе такое ж, як і ў праграмах беларускага Міністэрства адукацыі. А ў нас увесь сэнс у тым, каб можна было атрымаць самыя сучасныя еўрапейскія веды. Мы хочам ісці ў нагу са светам, — мяркуе палітык і дадае. —
«Хоць мы і зарэгістраваныя як «Вольны беларускі ўніверсітэт», на самай справе гэта не зусім універсітэт. Гэта, хутчэй, такі аператар, які будзе дапамагаць еўрапейскім універсітэтам выйсці на беларускі навучальны рынак, і навучэнцы змогуць паспрабаваць атрымаць еўрапейскія веды праз інтэрнэт. І дыпломы павінен выдаваць, вядома, не фонд, а менавіта добры еўрапейскі ўніверсітэт».
Навучанне прадугледжваецца на англійскай і беларускай мовах.
Што да аплаты за навучанне, то Аляксандр Мілінкевіч зазначае, што навучанне спачатку будзе бясплатнае, а потым платнае.
«Не сур'ёзна спадзявацца на тое, што донары будуць увесь час нас фінансаваць. Трэба выходзіць на самаакупнасць. І калі праект атрымаецца, калі будзе вялікая колькасць навучэнцаў, то мы хацелі б зрабіць адукацыю платнай. Але кошт будзе адназначна таннейшы, чым сённяшняе завочнае навучанне ў Беларусі».
Адукацыя, якую мы хочам даць, не заменіць цалкам вочную адукацыю, але будзе вельмі сур'ёзным дадаткам да яе.
«Цяпер нам больш за ўсё падабаецца ідэя змешанага навучання, калі чалавек усё, што можа, вывучае ў інтэрнэце, а потым прыязджае на стажыроўку, на сесію і падчас дыскусійных панэляў ўжо сустракаецца з прафесарамі. Мне здаецца, на сённяшні дзень гэта адна з самых эфектыўных сістэм», — мяркуе Мілінкевіч.
На ўдакладняючае пытанне, ці пачне ўніверсітэт набіраць студэнтаў ужо сёлета, палітык адказаў: «Усё апынулася значна складаней, чым я думаў … Я ўжо шмат разоў казаў, і кожны раз нешта адкладалася. Таму на гэты раз лепш прамаўчу…»
Каментары