Журналіста Уладзіміра Чудзянцова арыштавалі на два месяцы. Падазраюць у кантрабандзе марыхуаны
Журналіста Уладзіміра Чудзянцова арыштавалі на два месяцы. Пра гэта Tut.by паведаміў ягоны адвакат Аляксандр Галіеў. Зараз журналіст знаходзіцца ў статусе падазраванага па справе аб спробе кантрабанды марыхуаны праз мяжу.
На беларуска-польскай мяжы пры даглядзе ў сумцы Уладзіміра знайшлі марыхуану. Сам журналіст па выніках агляду не знаходзіўся пад уплывам наркатычных рэчываў. 24 лістапада пракурор выбраў для Чудзянцова меру стрымання — арышт.
— Зараз ён арыштаваны на два месяцы. Ён застанецца пад вартай, калі на працягу тыдня яму будзе выстаўлена абвінавачванне, — сказаў адвакат. — Калі абвінавачванне не будзе прад'яўлена ў гэты тэрмін, то Уладзіміра павінны адпусціць на волю.
На момант публікацыі нататкі Уладзімір знаходзіцца ў ізалятары часовага ўтрымання. 25 лістапада ён будзе пераведзены ў СІЗА.
Па словах адваката, Уладзімір віну не прызнае і лічыць, што наркотыкі яму падкінулі. Абвінавачванняў у адрас канкрэтных супрацоўнікаў ён пакуль не выстаўляе.
У МУС сітуацыю з затрыманнем Уладзіміра Чудзянцова пакуль што не каментуюць.
Нагадаем, Уладзіміра Чудзянцова мытнікі знялі з цягніка на пункце пропуску «Брэст — Цярэспаль» увечары 21 лістапада. Журналіст накіроўваўся ў Варшаву. У сумцы ў яго пры мытным кантролі знайшлі невядомае рэчыва. У гэты ж дзень у журналіста дома правялі ператрус, дзе таксама выявілі невядомае рэчыва.
Цяпер чытаюць
«Сядзеў ужо 50 сутак, затрымалі яго дзяўчыну і брата». Сукамернік расказаў пра радыёаматара, арыштаванага за здраду дзяржаве4
Каментары