Гісторыя пра рудога сабаку, у якой павінен быць шчаслівы фінал ФОТЫ
Рыжуля, Роксі, Сабачка з прыпынка Фестывальны… Як толькі не называлі гэтага рудога сабачку, гісторыя якога пачалася некалькі месяцаў таму.
Адкуль у Маладзечне з’явіўся гэты цуд, невядома. Хутчэй за ўсё маленькага рудога сабачку нейкія «добрыя» людзі проста выкінулі як непатрэбную рэч.
Спачатку гэты маленькі цуд трапіў на мясцовую аграсядзібу. Сабачка так удала спраўляўся з коньмі, вадзіў іх на пашу, што, здавалася, вось прызванне гэтага маленькага метэора.
Але на тое ён і метэор. Аднойчы, відаць, Рыжулі стала сумна на аграсядзібе і яна пабегла шукаць сабе іншы дом.
Пасля ўжо валанцёры прыгадвалі, што бачылі яе ў горадзе, што сабачка бегаў услед за людзьмі, зазіраў у вочы і пытаўся: «Ну што, возьмеце да сябе? Я харошы».
Рыжулю ніхто не заўважаў.
І вось аднойчы ўжо халоднай восеньскай раніцай плач Рыжулі пачулі ўсе пасажыры ранішніх электрычак на прыпынку Фестывальны, што ў Маладзечне. Рыжуля не магла наступаць на лапку, лапка была ўся ў крыві. Расказвалі, што нейкі мужчына пабег у аптэку, узяў бінт і заматаў хворую лапку Рыжулі.
Рыжуля плакала, скуголіла. Ляжала на Фестывальным да самага вечара і чакала дапамогі. І, на яе шчасце, дачакалася. Валанцёрка дабрачыннай арганізацыі «Шанс на жыццё» забрала Рыжулю і адвезла ветэрынару. Ветэрынар сказаў, што, відаць, на лапку Рыжулі наехала машына. Тры пальчыкі з лапкі давялося выдаліць.
Рыжулю забрала да сябе валанцёр. І ўжо там, у цеплыні і бяспецы, Рыжуля, якой далі імя Роксі, хутка ішла на папраўку.
Валанцёры звязваліся з гаспадарамі аграсядзібы, дзе Роксі жыла да бяды, што з ёй здарылася, але там прызнаваць яе сваёй адмовіліся.
«Яна прыбілася да нас, пасля збегла. Гэта не наш сабака», — адказалі валанцёрам.
Лапка зажывала. Роксі стэрылізавалі. Яна зноў стала жвавай і актыўнай. Сабака прызвычаіўся да таго, што на лапцы не хапае пальчыкаў. І цяпер нават не кульгае.
Здавалася б, вось ён шчаслівы канец. Але ў гэтай гісторыі не хапае эпілогу, пра тое, як шчаслівая Роксі сустрэла нарэшце свайго шчаслівага гаспадара.
Роксі няма яшчэ і годзіка. Яна паслухмяная, вясёлая, добрая дзяўчынка. Ужываецца з іншымі сабакамі. Любіць дяцей. А памерам будзе прыкладна да калена.
Дапісаць гэтую гісторыю проста.
Тэлефануйце + 375291811216 і прыязджайце за сваім рудым шчасцем.
Цяпер чытаюць
«Рэтранслятары выключыць, зняць і паказаць нам, што яны знятыя». Зяленскі патлумачыў, чаму паставіў ультыматум і што мае зрабіць Мінск27
Каментары