Жыхарка Ліды прыдумала хітрую схему: набрала ў інтэрнэт-краме тавараў на 20 тысяч рублёў, але не заплаціла ні капейкі
У канцы лістапада ў гродзенскую міліцыю звярнулася ўладальніца інтэрнэт-крамы з Магілёва. Яна распавяла, што адна з кліентак з пачатку года рэгулярна замаўляе тавары, але не аплачвае іх.
Заказчыцай была 40-гадовая жыхарка Ліды. У студзені яна замовіла на сайце інтэрнэт-крамы інструменты і расходныя матэрыялы для манікюру.
Умовай адпраўкі тавару была перасылка менеджару фота чэка.
Праз інтэрнэт-банкінг лідчанкі правяла аперацыю, не маючы на карт-рахунку грошай. У атрыманым чэку яна абрэзала словы «аперацыя спынена» і адправіла прадаўцу.
Менеджар убачыў чэк і даў дабро на адпраўку тавару, не ўнікаючы ў дэталі і не правяраючы паступленне сродкаў.
Так як інтэрнэт-крама даволі буйная з мноствам кліентаў, то да канца восені ніхто не заўважаў адсутнасці аплаты ад жанчыны. Яна ж скарысталася гэтым цалкам, рэгулярна заказваючы тавар.
У сярэдзіне лістапада жанчына памылілася і адправіла чэк цалкам, але нават гэты пракол застаўся незаўважаным: заказ больш чым на тысячу рублёў ёй адправілі.
Так ці інакш, але нястачу немалой сумы на рахунку заўважыла ўладальніца крамы. Праверыўшы апошні чэк кліенткі і ўбачыўшы інфармацыю аб адмове ў правядзенні аперацыі, яна вывучыла ўсю гісторыю «плацяжоў» заказчыцы, пасля чаго звярнулася ў міліцыю.
За ўвесь час фігурантка паспела атрымаць больш за 50 пасылак агульным коштам звыш 20 тысяч рублёў.
Каментары