Лідарка літоўскіх лібералаў: Пераезд Ціханоўскай у Польшчу — страта для Літвы
«Калі Святлана Ціханоўская бывала ў розных сталіцах, яна заўсёды выказвала ўдзячнасць Літве і падкрэслівала значэнне Літвы як ключавога партнёра ў барацьбе за дэмакратыю».
Лідарка Руху лібералаў Вікторыя Чміліце-Нільсен заявіла, што рашэнне Святланы Ціханоўскай пераехаць у Польшчу з’яўляецца значнай стратай для Літвы. Палітык падкрэсліла, што адказнасць за гэта ляжыць на кіраўніцы ўрада Інзе Ругінене, паколькі, на думку лібералаў, менавіта ўсвядомленае рашэнне прэм’ер-міністра знізіць узровень аховы Ціханоўскай прывяло да гэтага кроку.
«Я лічу, што гэта страта. І ў мяне ёсць падставы так думаць. Святлана Ціханоўская, магчыма, была не так заўважная ў самой Літве, як ад яе чакалі, але яна была і, я не сумняваюся, застаецца важным амбасадарам беларускай апазіцыі і грамадзянскай супольнасці Беларусі ва ўсім свеце. Гэта палітык і лідар, якога прымаюць кіраўнікі ўсіх найбуйнейшых і меншых дзяржаў — саюзнікаў Літвы», — сказала Чміліце-Нільсен, перадае LRT.
«Калі Святлана Ціханоўская бывала ў розных сталіцах і гаварыла пра сваю краіну, (…) яна заўсёды выказвала ўдзячнасць Літве і падкрэслівала значэнне Літвы як ключавога партнёра ў барацьбе за дэмакратыю», — адзначыла яна.
Палітык мяркуе, што адказнасць за гэтае рашэнне Ціханоўскай нясе цяперашні ўрад і яго кіраўніца Інге Ругінене.
«Гэта было сапраўды ўсвядомленая пастанова — знізіць узровень аховы, паслаць сігнал рэжыму Аляксандра Лукашэнкі (…) пра тое, што мы не цэнім гэтага і што нам было б зручней, каб яна з’ехала. На мой погляд, гэта страта для нас, калі казаць выключна пра нашы інтарэсы. І, на жаль, у кантэксце міжнароднай палітыкі Літва ўсё больш ператвараецца ў правінцыю і страчвае важныя рычагі», — заявіла Чміліце-Нільсен.
Прэм’ерка Інга Ругінене раней адзначыла, што не бачыць у гэтым пераездзе «ні выгады, ні страты».
Літва вырашыла скараціць фізічную ахову Святланы Ціханоўскай восенню 2025 года. Яе ахова была перададзена ад Службы бяспекі кіраўніцтва дзяржавы Бюро крымінальнай паліцыі.
Цяпер чытаюць
Беларусаў па вяртанні дамоў на мяжы ўсё часцей раздзяваюць дагала18
Каментары
Цяпер будзе выказваць падзякі Польшчы і пра Летуву ўсе забудуцца? У гэтым праблема?
Таму што, мяркую, самазадаволеная і абмежаваная, а, значыць, сама невыгадная для краіны.