Сведка-міліцыянт: Апазіцыя ў нас невялікая. І ўсе чамусьці на літару С
У судзе над журналісткай «Новага часу» Дзіянай Серадзюк (яе таксама судзяць за ўдзел у мітынгу супраць інтэграцыі) атрымаўся цікавы дыялог паміж суддзёй і сведкам-міліцыятам. Фрагменты яго прыводзіць у сваім фэйсбуку Глеб Рубанаў.
— Адкуль вы ведаеце Дзіяну Серадзюк?
— Апазіцыя ў нас невялікая, дзяўчына прыкметная і сімпатычная.
— Каго вы яшчэ апазналі на мітынгу апазіцыі?
— Севярынец, Статкевіч, Спарыш, Сіўчык.
— А каго-небудзь з прозвішчам не на С?
— Не памятаю.
…
- Чаму паказанні ўсіх сведкаў слова ў слова супадаюць з рапартам, які вы пісалі?
— Так атрымалася.
…
- Вы пісалі рапарт ад рукі, чаму ў справе ён надрукаваны?
- Я пісаў яго ад рукі, не ведаю чаму ў справе ён друкаваны.
- Подпіс ваш?
- Подпіс мой.
У матэрыялах справы фігураваў фатаздымак, на якім відаць натоўп людзей, але немагчыма дакладна сказаць, ці ёсць там Серадзюк. Дакладна можна сказаць, што фота зрабілі не на Кастрычніцкай плошчы: відаць слупкі з ланцужкамі, якіх на плошчы няма, звяртае ўвагу Радыё Свабода.
Сама Серадзюк сцвярджала, што была ў час акцыі ў знаёмай у іншай частцы горада. Гэта пацвердзіў ейны муж і тая знаёмая, у якой гасціла журналістка.
Справа была адпраўлена на дапрацоўку.
Цяпер чытаюць
Маладую беларуску пратрымалі ў расійскім СІЗА амаль 4 гады і апраўдалі. А кампенсацыю далі такую, нібыта ў твар плюнулі10
Каментары