Што вядома пра першага намесніка старшыні КДБ Сяргея Церабава і яго сям’ю
Аляксандр Лукашэнка 25 лютага прызначыў генерал-маёра Сяргея Церабава першым намеснікам старшыні КДБ. Гэтая пасада была вакантнай пасля таго, як Ігар Сергеенка ў снежні заняў крэсла кіраўніка Адміністрацыі прэзідэнта.
Сяргею Церабаву 48 гадоў. Ён нарадзіўся ў Барысаве. Вучыўся ў Чарапавецкім вышэйшым вайскова-інжынерным вучылішчы радыёэлектронікі. У органы дзяржбяспекі трапіў у 2000 годзе. Папрацаваў у вайсковай контрразведцы, цэнтральным апараце КДБ, а таксама ва ўпраўленні па Мінску і Мінскай вобласці.
У маі 2014 Сяргей Церабаў быў прызначаны начальнікам КДБ па Гомельскай вобласці, якое і ўзначальваў аж да гэтага часу. У Гомель Церабаў ехаў палкоўнікам, а вяртаецца ў Мінск ужо генерал-маёрам.
«Наша Ніва» знайшла роднага дзядзьку Сяргея Церабава. Аляксандру Сцяпанавіча Церабаву 80 гадоў, ён кандыдат філасофскіх навук, працаваў дацэнтам на юрфаку БДУ. Прызнаецца, што пляменнік амаль не стасуецца з роднымі.
Прозвішча Церабаў намесніку старшыні КДБ дасталося ад дзеда Сцяпана, які паходзіць з Пермскай вобласці Расіі (гэта Урал). Сцяпан быў вайскоўцам, служыў на Далёкім Усходзе падчас Другой сусветнай вайны. Там ён і пазнаёміўся з жонкай, якая была родам з Фаніпаля пад Мінскам.
На Далёкім Усходзе бабуля Церабава таксама праходзіла вайсковую службу.
У Беларусь сям’я пераехала ў 1965 годзе. Пасля гэтага нікуды ўжо не з’язджалі. Бацька намесніка старшыні КДБ Яўген Церабаў таксама стаў вайскоўцам, даслужыўся да падпалкоўніка. Большую частку жыцця ён правёў у Гродне, там жа рос і Сяргей, там жа нарадзіліся ягоныя дзеці.
У Сяргея Церабава ёсць старэйшы брат, ён палкоўнік запасу МУС. Бацькі спецслужбіста ўжо памерлі: бацька каля дзесяці гадоў таму, а маці — каля пяці. Мама працавала на прадпрыемстве на «Гродна Азоце».
У Мінск з Гродна Сяргей Церабаў перабраўся ў 2005 годзе. Праз некалькі гадоў змог пабудаваць кватэру ў Сухараве.
У Сяргея Церабава двое сыноў — Аляксандр і Дзмітрый. Старэйшы ў 2017 годзе скончыў аўтатрактарны факультэт БНТУ. Малодшы вучыцца ў БДЭУ на міжнародных эканамічных адносінах.
Цяпер чытаюць
Малады работнік «Мінск-Арэны» павінен заплаціць 71 мільён даляраў10
Каментары