«Гэта скульптура ў прыватным двары». Хто дазволіў усталяваць помнік сербскаму бізнэсмену на вуліцы Станюты?
У Міністэрстве культуры і ва ўпраўленьні культуры Менгарвыканкама паведамілі, што не давалі дазволу на ўсталяваньне помніка сэрбскаму бізнэсоўцу Срэтэну Карычу на вуліцы Стэфаніі Станюты ў Менску, піша «Радыё Свабода».
У Міністэрстве сказалі, што «ніякіх рашэньняў на гэты конт не прымалі і ў гэтым выпадку не патрабавалася ўзгадненьне з Міністэрствам культуры». Паводле ўпраўленьня культуры, «гэтае пытаньне ў Менгарывканкаме не разглядалася». Помнік Срэтэну Карычу, заснавальніку Dana Holdings, усталяваны ў катэджным пасёлку на вуліцы Стэфаніі Станюты, уваход на якую звычайным грамадзянам забаронены.
«Я проста ў шоку»
Аўтар скульптуры Яраслаў Філіповіч сказаў, што гэта скульптура ўсталявана за ўласныя грошы заказчыка на тэрыторыі, якая належыць прыватнай асобе. Ён выказаўся адносна нэгатыўнай рэакцыі ў сеціве на ўсталяваньне скульпутры.
«Я наогул не разумею прэцэдэнта, што каму і чаму не падабаецца. Калі я пастаўлю ў сябе ў агародзе садовага гноміка і нейкаму мінаку не спадабаецца, скажа: чаму ён чырвоны, а не зялёны, прыбяры яго — вам не падаецца гэта дзіўным? Гэта скульптура ў прыватным двары».
Яраслаў Філіповіч сказаў, што гэта была прыватная замова, дэталі якой ён ня можа раскрываць.
«Былі пажаданьні заказчыка. Я пазнаёміўся з біяграфіяй, сваякамі, улічыў іх пажаданьні і стварыў вобраз. Выява з распасьцёртымі абдымкамі, ён быў душа-чалавек і гэта было пажаданьне заказчыка, нібыта ён сустракае сваякоў».
Паводле аўтара, яму вельмі непрыемна тое, што адбываецца вакол усталяваньня скульптуры.
«Я проста ў шоку», — кажа Яраслаў Філіповіч.
Ён кажа, што ня супраць таго, каб у Менску ўсталявалі помнікі Стэфаніі Станюце, Васілю Быкаву і іншым знакамітасьцям.
«А гэта ж прасьцей за ўсё напісаць недзе ў фэйсбуку, што скульптуру трэба прыбраць. Калі хочаце паставіць побач помнік Стэфаніі Станюце, пастаўце, хто ж вам перашкаджае. Але ж гэта трэба напружвацца, шукаць грошы. Прасьцей сядзець на канапе і падымаць нейкую хвалю».
На відэа выглядае, што помнік Срэтэну Карычу ўсталяваны не ў двары, а менавіта на вуліцы.
На платформе petitions.by працягваецца збор подпісаў пад пэтыцыяй у Менгарывканкам з просьбай патлумачыць, кім ініцыявана ўстаноўка «дадзенага твора манумэнтальнага мастацтва» і прывесьці абгрунтаваньне неабходнасьці яго ўстаноўкі.
Цяпер чытаюць
Памёр паэт Уладзімір Карызна, аўтар слоў да цяперашняга дзяржаўнага гімна Беларусі3
Каментары