Камуніст Клішэвіч: Асноўная сацыяльная падтрымка ва ўмовах каранавіруса — магчымасць працягваць працаваць

Такое меркаванне карэспандэнту БЕЛТА выказаў член Пастаяннай камісіі Палаты прадстаўнікоў па адукацыі, культуры і навуцы Сяргей Клішэвіч.

Павялічыць

«Сёння асноўная форма сацыяльнай падтрымкі — гэта магчымасць працягваць працу, а таксама захаванне працоўных калектываў на прадпрыемствах, у тым ліку горадаўтваральных, — адзначыў Сяргей Клішэвіч. — Для параўнання, каранцін у большасці краін ЕЗ не ўключаў якіх-небудзь выплат фізічным асобам, а таксама адтэрміноўкі камунальных плацяжоў і арэнды. Беларусь як сацыяльна арыентаваная дзяржава не магла пайсці аналагічным шляхам, аплачваючы каранцін за кошт асабістых сродкаў сваіх грамадзян. Таксама хацелася б звярнуць увагу, што тыя сродкі, якія вылучае Еўракамісія, накіраваныя ў першую чаргу на падтрымку канкрэтных галін эканомікі і, у першую чаргу, прамысловасці і транспарту. Гэта сведчыць пра тое, што канкурэнтная барацьба нікуды не знікла і будзе абвастрацца па меры выхаду краін з каранціну».

Парламентарый падкрэсліў, што ў Беларусі няма неабходнасці ўвядзення каранціну. «У краіне меры строгага каранціну не ўводзіліся ў першую чаргу дзеля прамысловасці, паколькі спыненне рэальнага сектара мацней за ўсё адбілася б на сацыяльнай сітуацыі, — сказаў ён. — Акрамя таго, працяглая сацыяльная дэпрывацыя ў жорсткіх формах разам са знешнім інфармацыйным ціскам прыводзяць да шэрагу непажаданых наступстваў: дэпрэсій, асацыяльных паводзінаў. Усё гэта можна аднесці да «заслуг» каронапсіхозу, пра які неаднаразова казаў прэзідэнт», — патлумачыў ён.

Сяргей Клішэвіч дадаў, што сёння можна эфектыўна выконваць меры сацыяльнай ізаляцыі і дыстанцыявання, не спыняючы пры гэтым вытворчы працэс.

«Да прыкладу, падчас наведвання паліграфічнага камбіната імя Якуба Коласа ў Мінску я адзначыў высокі ўзровень мер бяспекі на розных вытворчых участках. Фактычна прадпрыемства закрытае для старонніх, а знешнія кантакты супрацоўнікаў мінімізаваныя. Гэта дазваляе пазбегнуць заражэння па вытворчым прынцыпе, — распавёў ён. — Аднак у вольны час неабходна абмежавацца маршрутам «праца — дом» і пазбягаць непатрэбных кантактаў. Безумоўна, хацелася б адзначыць вытрымку, стойкасць і сабранасць нашага насельніцтва і разуменне ім праблемы. З нашага ж боку чуткам і рознага роду інтэрнэт-укідам трэба супрацьпаставіць жывыя, рэальныя зносіны з працоўнымі калектывамі».

Сяргей Клішэвіч рабіў кар'еру ў дзяржаўнай моладзевай арганізацыі БРСМ. У лістападзе 2019-га стаў дэпутатам Палаты прадстаўнікоў, вылучаўся праз збор подпісаў і ад Камуністычнай партыі Беларусі.

• 0
• 0
• 0
• 0
• 0
• 0
• 0
• 0