На Палессі пройдзе фестываль барсукоў — са стэндапам і рознымі цікавосткамі
У канцы чэрвеня ў Беларусі пройдзе незвычайны фестываль.
Ён цалкам прысвечаны адной жывёле — барсуку. Самі арганізатары называюць яго «самым загадкавым і смешным жыхаром лесу». Мерапрыемства пад назвай «Ноч барсукоў» адбудзецца ў нацыянальным парку «Прыпяцкі» 20—21 чэрвеня, піша Onliner.by.
Гэта турбаза ў лесе пад назвай «Хлупінская Буда» — адно з самых дзікіх месцаў нацыянальнага парку.
Праграма нечаканая. Напрыклад, можна будзе пачуць (магчыма, упершыню ў гісторыі) стэндап пра барсукоў. У планах таксама квэст і майстар-клас.
Асноўная частка мерапрыемства пройдзе ў вечаровым лесе. Наведвальнікі змогуць ужывую пабачыць сапраўдны барсучы горад і на месцы вывучыць яго ўладкаванне. Уся экскурсія зойме каля дзвюх гадзін.
Пасля госці свята змогуць раскласці вогнішча і прагуляцца ў закінутую вёску ў «Хату барсука». Магчыма, пашанцуе сустрэць соваў і пачуць ваўкоў. Нават грыль-меню ў гэты дзень атрымала назву «Сыты барсук». Але прычын для хвалявання няма — ніводны жыхар лесу не пацярпеў.
Раніцай можна будзе адправіцца на экскурсію — «з барсуком» — па эка-сцежцы «Хлупінская Буда». Акрамя таго, ахвотных чакаюць лазня, більярд і пракат ровараў. Збор удзельнікаў адбываецца ў Тураве, але ахвотных змогуць забраць і ў Ляскавічах ці Жыткавічах.
Удзел у фестывалі платны. З улікам пражывання, харчавання, трансферу і забаў, кошт для дарослых — 190 рублёў, для дзяцей ад 6 да 16 гадоў — 170 рублёў.
Барсукоў называюць сапраўднымі архітэктарамі дзікай прыроды. Яны ствараюць пад зямлёй вялізныя «гарады» з сотнямі метраў лабірынтаў, вентыляцыяй і асобнымі спальнямі, якія перадаюцца па спадчыне і могуць пашырацца на працягу тысячагоддзяў.
Гэтыя звяркі маніякальныя чысцюлі: рэгулярна змяняюць сухую падсцілку з травы ў сваіх гнёздах і абсталёўваюць спецыяльныя туалеты — выграбныя ямы далёка за межамі жылых зон. Яны ўпадаюць у зімовую спячку, а да восені падвойваюць сваю вагу, назапашваючы тлушч. Іх шчыльная скура настолькі ўнікальная, што абараняе ад укусаў пчол, змеяў і нават зубоў буйных драпежнікаў, дазваляючы барсуку літаральна пракручвацца ўнутры ўласнага футра, каб нанесці ўдар у адказ.
Цяпер чытаюць
Дэпутатка, якая рыхтуе прыгажунь для Лукашэнкі, выйшла замуж21
Каментары