Справа збітага над Данбасам «Боінга»: следства цалкам абвергла версію аб датычнасці ўкраінцаў
На судзе ў справе аб катастрофе «Боінга» Малайзійскіх авіяліній над Данбасам 17 ліпеня 2014 года, які праходзіць у Нідэрландах, бок абвінавачвання працягнуў прыводзіць свае доказы, піша Радыё Свабода.
Абвінавачванне разабрала, чаму следства адпрэчыла розныя тэорыі аб катастрофе, якія падтрымлівалі у тым ліку афіцыйныя прадстаўнікі Расіі. Гаворка, у прыватнасці, аб сцвярджэннях, што «Боінг» мог быць збіты украінскімі вайскоўцамі. Следства прааналізавала звесткі радараў: ніводзін украінскі радар у зоне катастрофы ў момант яе не працаваў.
Абвінавачванне знайшло чалавека, які выдаваў сябе за «іспанскага дыспетчара Карласа», які нібыта паведаміў пра ўкраінскія самалёты побач з «Боінгам». Ён прызнаўся, што не працуе дыспетчарам, а за хлусню яму заплацілі.
Дадзеных вайсковых радараў Расія следчай групе не перадала, расійскі бок таксама паведаміў, што спадарожнікавыя здымкі таксама не захаваліся. Следства таксама адхіліла выказаную расійскім канцэрнам «Алмаз-Антэй» версію пра тое, што «Боінг» мог быць збіты з тэрыторыі, кантраляванай Украінай.
Абвінавачванне таксама расказала пра высновы следства аб перамяшчэнні ўстаноўкі «Бук», з якой меркавана быў збіты «Боінг», з Расіі ў раён Снежнага на тэрыторыі, падкантрольнай прарасійскім сепаратыстам, і назад у Расію. Прынамсі двое сведак расказалі, што бачылі пуск ракеты 17 ліпеня.
Абвінавачанні ў катастрофе завочна прад’явілі тром грамадзянам Расіі і аднаму грамадзяніну Украіны, якія ўдзельнічалі ў баявых дзеяннях супраць украінскіх войскаў на Данбасе ў 2014 годзе. Ніводзін з іх на судзе не прысутнічае. Паводле следства, у справе могуць з'явіцца і іншыя абвінавачаныя, у тым ліку звязаныя з расійскімі Узброенымі сіламі.
Пры катастрофе «Боінга» загінулі ўсе 298 чалавек, якія былі на борце.
Каментары