Пара птушак пазнаёмілася два гады таму, але раней самка злятала на зімоўку.
Яшчэ птушанём журавель з пашкоджаным крылом трапіў да жыхара Маладзечанскага раёна. Той яго падлячыў і пакінуў жыць на падворку, бо лятаць журавель больш не змог, расказвае гісторыю Smartpress.by.
Два гады таму, калі пралятала чарада суродзічаў, журавель вітаў іх крыкамі — і адна з птушак спусцілася да яго. І засталася. Разам пара праводзіла шмат часу. Але ўвосень 2024 года новая сяброўка далучылася да вялікай чарады і накіравалася на поўдзень на зімоўку.
Самка жураўля. Фота: Віктар Казлоўскі / Smartpress.by
Вясной 2025‑га птушка вярнулася да траўмаванага жураўля. Пры сустрэчы яны выканалі некалькі танцаў. І на гэты раз спадарожніца жураўля засталася на зімоўку з ім. Але хатняй не стала — калі журавель на ноч заходзіў у сарай у маразы, яна заставалася на вуліцы на ахапку салому. І гэта ў 30‑градусныя маразы! А на раніцу журавель выбягаў хутчэй да сваёй сяброўкі.
Гэтай вясной на падворак завітала чарада з 12 журавоў. Гаспадар баяўся, што сяброўка яго падапечнага зляціць з імі. Але птушкі паперакрыкваліся, паляцелі далей — а парачка засталася.
Каментары