У Літве ненавісніку беларусаў далі хатнюю хімію і забаранілі карыстацца інтэрнэтам

Суд у Вільні прызнаў мясцовага прарасійскага актывіста Лаўрынаса Рагельскiса вінаватым у распальванні нянавісці да яўрэяў і беларусаў, а таксама ў апаганьванні месца грамадскага ўшанавання. Яму прызначылі пакаранне — адзін год і дзевяць месяцаў абмежавання волі без інтэнсіўнага нагляду, а таксама штраф сумай 12,5 тысячы еўра, паведамляе LRT.

Акрамя таго, суд абавязаў Лаўрынаса Рагельскіса прайсці праграму карэкцыі паводзін, працаваць або зарэгістравацца ў службе занятасці, а таксама бясплатна адпрацаваць 100 гадзін ва ўстановах аховы здароўя і сацыяльных паслуг, якія даглядаюць пажылых людзей і людзей з інваліднасцю.

На час абмежавання волі яму забаронена карыстацца сацыяльнымі сеткамі і інтэрнэт-платформамі, ствараць і распаўсюджваць любы кантэнт, весці трансляцыі, каментаваць матэрыялы, ствараць новыя сайты і акаўнты, а таксама карыстацца чужымі акаўнтамі. Пры гэтым яму дазволена выкарыстоўваць электронныя дзяржаўныя сэрвісы і інтэрнэт-банкінг.

Пасля ўступлення прысуду ў сілу за выкананнем накладзеных абавязкаў будзе сачыць служба прабацыі. Магчымае выкарыстанне IT-спецыялістаў для кантролю.

Справа разглядалася з 2022 года і неаднаразова адкладалася. Усяго адбылося 67 судовых пасяджэнняў. Абвінавачаны ў суд не з’явіўся. У апошнім слове ён віну не прызнаў.

Паводле абвінавачання, Рагельскiс здымаў і распаўсюджваў відэа, у якіх публічна абражаў і высмейваў розныя групы людзей па прыкмеце нацыянальнасці, палітычных поглядаў і перакананняў. У матэрыялах справы адзначаецца, што ён таксама апаганіў імправізаваны мемарыял у памяць пра загінулых падчас падзей у Беларусі, зняўшы і выклаўшы адпаведнае відэа.

Прызначанае пакаранне часткова супадае з ранейшымі прапановамі пракурора, які таксама прасіў абмежаванне волі, штраф і дадатковыя абавязкі.

Дэпартамент дзяржбяспекі Літвы характарызуе Рагельскіса як «палітычнага маргінала», які актыўна супрацоўнічае з беларускімі прапагандыстамі і курыруе антызаходнія і прарасійскія рэсурсы на літоўскай мове.

Крымінальная справа супраць Рагельскіса была перададзеная ў суд яшчэ ў 2022 годзе, аднак працэс зацягнуўся на гады. Прарасійскі актывіст, які выдатна валодае літоўскай мовай, дэманстратыўна патрабаваў перакладчыка на рускую і перакладу ўсіх матэрыялаў справы. Ён шэсць разоў мяняў адвакатаў, спрабаваў даць адвод суддзі, засыпаў суд хадайніцтвамі.

Лаўрынас Рагельскіс з 2020 года час ад часу выступаў у беларускіх дзяржаўных СМІ, падчас чаго ў абразлівай форме адгукаўся пра апанентаў Лукашэнкі.

Мемарыял каля беларускай амбасады ў Вільні Рагельскіс спрабаваў разбурыць у кастрычніку 2020 года. У дачыненні да яго была распачатая справа аб «распальванні варожасці»і «апаганьванні памятнага месца».

• 34
• 0
• 2
• 5
• 0
• 0
• 2
• 0