У Хоцімскім раёне дзве фуры, прарываючыся да мяжы, ледзь не збілі даішнікаў. Міліцыя адкрыла агонь ВІДЭА
Як паведамляе МУС, у Хоцімскім раёне фуры спрабавалі прарвацца праз мяжу і ледзь не збілі даішнікаў.
12 чэрвеня супрацоўнікі ДАІ ў Хоцімску заўважылі падазроную калону з трох фур: Volvo, Scania і Iveco. Аўтамабілі рухаліся ў бок мяжы з Расіяй. Праверыць грузавікі аказалася не так проста: кіроўцы фур ігнаравалі патрабаванні аб спыненні, і супрацоўнікам ДАІ прыйшлося іх пераследваць.
У выніку 2 фуры ўдалося спыніць на 11-м кіламетры трасы «Хоцімск-Ліпаўка-мяжа РФ», а вось трэці падазроны аўтамабіль з'ехаў. У кіроўцаў, 29 гадовага і 43-гадовага жыхароў Мінскай вобласці, не было дакументаў на груз, а прычэпы былі апячатаныя. Як растлумачылі самі затрыманыя, што знаходзіцца ў прычэпах, яны не ведаюць.
Пакуль супрацоўнікі ДАІ апытвалі кіроўцаў, на месца здарэння прыехаў 49-гадовы мінчанін, які сцвярджаў, што менавіта ён з'яўляецца ўладальнікам грузу. Затрыманым ён загадаў садзіцца ў фуры і ехаць па маршруце. З такім рашэннем «гаспадара грузу» праваахоўнікі не пагадзіліся і заступілі шлях двум грузавікам. Вось толькі для кіроўцаў загад начальства быў важнейшы, чым рызыка задушыць супрацоўнікаў ДАІ, і яны працягнулі рух.
Даішнікам прыйшлося адступіць, але, пасля некалькіх папераджальных стрэлаў у паветра, яны расстралялі колы абедзвюх фур. Нягледзячы на пашкоджанні, абодва грузавіка змаглі перасячы мяжу і схаваліся на тэрыторыі Расіі.
Іх знайшлі праз нейкі час у Смаленскай вобласці расійскія калегі. Высветліць, што ў іх перавозілі, пакуль што не ўдалося.
На кіроўцаў завялі крымінальныя справы за гвалт у дачыненні да супрацоўнікаў ДАІ, а таксама склалі адміністрацыйныя пратаколы, як і на ўладальніка грузаў. Пракурор Хоцімскага раёна прызначыў аднаму з падазраваных заклад 1000 базавых, а іншаму — узяцце пад варту.
Цяпер чытаюць
У пачатку 2000‑х трое настаўнікаў гісторыі збеглі ва Украіну ад «генацыду беларускага народа», які чыніў рэжым Лукашэнкі. Як склаўся іх лёс?5
Каментары