Галоўны трэнер зборнай Фінляндыі па скачках з трампліна перабраў на Алімпіядзе з алкаголем
Галоўнага трэнера зборнай Фінляндыі па скачках з трампліна Ігара Медведа датэрмінова адправілі дадому з зімовых Алімпійскіх гульняў у Мілане і Карціна-д'Ампеца праз парушэнне ім правіл адносна алкаголю, паведамляе Yle.fi.
Са слоў кіраўніка фінскай алімпійскай каманды Янэ Ханінена, здарэнне, якое стала прычынай такога рашэння, адбылося не падчас выканання Медведам сваіх абавязкаў, таму дэталі інцыдэнту не раскрываюцца.
Сам Ігар Медвед у афіцыйнай заяве прызнаў сваю віну, выказаў шкадаванне і заявіў, што «не ганарыцца сабой». Ён папрасіў прабачэння ў спартсменаў, трэнераў і заўзятараў фінскай зборнай, адзначыўшы, што хоча, каб каманда магла засяродзіцца на спаборніцтвах і працягваць сваю працу.
Медвед расказаў, што інцыдэнт адбыўся 10 лютага ў горадзе Прадаца пасля таго, як зборная Славеніі па скачках з трампліна заваявала залаты медаль у змяшаных камандных спаборніцтвах. Сам Ігар Медвед — славенец, а таму для яго гэтая перамога не была чужой. Трэнер патлумачыў:
«Пасля спаборніцтваў мяне запрасілі на святкаванне залатога медаля Славеніі. Я нічога не еў, і алкаголь зрабіў сваю справу».
Медвед падкрэсліў, што, нягледзячы на свой учынак, ён ганарыцца сваёй камандай і працай, праведзенай у Фінляндыі за апошнія два гады. Таксама адзначыў, што хоча дазволіць спартсменам спакойна працаваць і мінімізаваць шкоду, якую ён нанёс.
Ігару Медведу 44 гады, ён былы славенскі скакун з трампліна, а галоўным трэнерам зборнай Фінляндыі працуе з 2024 года.
Пасля шасці дзён спаборніцтваў на Алімпіядзе ў скачках з трампліна разыграныя ўжо тры з шасці камплектаў медалёў, і фінскія «лятучыя лыжнікі», у адрозненне ад славенскіх, пакуль не заваявалі ніводнай узнагароды. У тых злашчасных для Медведа змяшаных камандных спаборніцтвах фіны засталіся на 6‑й пазіцыі з 12‑ці камандаў, а ў індывідуальных спаборніцтвах найлепшы пакуль вынік — 14‑е месца Вільха Паласаары ў мужчынскіх скачках з нармальнага трампліна.
МАК трапіў пад агонь крытыкі за продаж футболак з сімволікай Алімпійскіх гульняў, праведзеных Гітлерам
Прэзерватываў, назапашаных для спартсменаў на Алімпіядзе ў Італіі, хапіла на тры дні
Стурла Хольм Легрэйд выбачыўся перад былой дзяўчынай за аповед пра здраду
Італьянская гарналыжніца стала алімпійскай чэмпіёнкай, менш чым за год аднавіўшыся пасля цяжкага пералому
Цяпер чытаюць
«Калі шандарахне па цягніку, хто будзе лідарам дэмсіл?» Два дні з дэлегацыяй Ціханоўскай у Кіеве — што засталося за кадрам18
Каментары
Pir u čas čumy...