«Здзекі, вошы, беззаконне». Як адбыў 15 сутак на Акрэсціна мазырскі фермер
20 чэрвеня вызвалілі з турмы на Акрэсьціна Аляксандра Вянгуру — мазырскага фэрмэра, пра якога паказваў сюжэт Сяргей Ціханоўскі. Да арышту ў фэрмэра быў ператрус — 18 чалавек «перавярнулі дом дагары нагамі». Падчас ператрусу маці Аляксандра зламалі пальцы на руцэ, піша «Свабода».
5 чэрвеня пасьля ператрусу Аляксандр Вянгура пайшоў у Мазырскі РАУС, каб забраць свой ноўтбук. І ня выйшаў з будынку міліцыі. Жонка два дні не магла знайсьці Аляксандра — і ў міліцыі, і ў ІЧУ адказвалі, што нічога ня ведаюць. Пазьней стала вядома, што ён арыштаваны на 15 сутак за нібыта дробнае хуліганства і непадпарадкаваньне міліцыі. Разам з Аляксандрам былі асуджаны прыхільнікі Ціханоўскага Дзяніс Колас і Аляксандр Цуканаў. Іх траіх чамусьці завезьлі адбываць пакараньне ў Менск.
«Што там рабілася — я такога ніколі ня бачыў. Шмат людзей сядзіць цяпер «па палітыцы». На чатыры месцы ў камэры нас сядзела шасьцёра. На дзень забіралі матрацы, можна было толькі стаяць. Але і ноччу ўрываліся ў камэры, рабілі нейкія праверкі, пыталіся ў нас: «Ну як маецеся?» Гэта каб не даваць спаць. Закідалі да нас у камэру бяздомных, вошы пладзіліся… Бррр, страх. Адваката да мяне не дапусьцілі — нібыта праз каранавірус. Пры гэтым мыцца нармальна не давалі. Зьдзек проста быў, і беззаконьне», — распавёў Аляксандар.
У яго ў вёсцы Прудок пад Мазыром — вялікая гаспадарка. Маці, пакуль Аляксандар сядзеў, не магла дапамагаць нявестцы — праз пераламаныя пальцы. Ірына, жонка фэрмэра, сама мусіла даваць рады і палеткам, і жывёлам.
Цяпер Аляксандар сьпяшаецца дахаты ў Прудок. Толькі ня мае пэўнасьці — ці не затрымаюць яго зноў. «Ведаеце, у чым мяне абвінавацілі? Нібыта я, калі быў у міліцыі, недзе ня там памачыўся і нібыта аказаў супраціў міліцыі! Гэта калі прыйшоў забраць ноўтбук. Проста ня ведаю, што робіцца цяпер у Беларусі», — дадаў фэрмэр.
Цяпер чытаюць
Былога супрацоўніка контрразведкі КДБ арыштавалі за здраду дзяржаве8
Каментары