Суд не задаволіў скаргу адвакатаў на затрыманне Віктара Бабарыкі
Сёння адбылося закрытае пасяджэнне суда Цэнтральнага раёна Мінска па скарзе адвакатаў на затрыманне Віктара Бабарыкі. Суд скаргу не задаволіў, распавялі TUT.BY абаронцы прэтэндэнта ў прэзідэнты Дзмітрый Лаеўскі і Аляксандр Пыльчанка.
Цяпер пастанова раённага суда будзе абскарджана ў Мінскім гарадскім судзе. Згодна з законам пры разглядзе такой скаргі суд можа прызнаць затрыманне незаконным і ў тым выпадку, калі ў дачыненні да затрыманага было дапушчана парушэнне права на абарону.
— Мы, абаронцы, як і сам Віктар Дзмітрыевіч, адзначалі грубае парушэнне яго права на абарону яшчэ ў дзень затрымання — калі ён знаходзіўся ў будынку ДФР, патрабаваў адвакатаў, а адвакатаў не пускалі ў будынак, нягледзячы на адпраўленыя імі па электроннай пошце дакументы аб паўнамоцтвах і скаргі, — сказаў Дзмітрый Лаеўскі.
Акрамя таго, пасля судовага пасяджэння адвакаты распачалі новую спробу наведаць падабароннага ў СІЗА — вынік той жа: бюро пропускаў КДБ не прымае дакументы для наведвання са спасылкай на эпідэмію.
— У сувязі з гэтым я падаў у Генеральную пракуратуру ўжо трэцюю на гэтым тыдні скаргу на перашкоды ў аказанні юрыдычнай дапамогі, цяпер у скарзе абаронца канстатаваў ужо сістэматычнае парушэнне. Абарона спадзяецца, што Генеральная пракуратура прыме меры да таго, каб перашкоды ліквідавалі. Пра рэакцыю пракуратуры на дзве папярэднія скаргі пакуль не вядома, — адзначыў Лаеўскі.
Цяпер чытаюць
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары