Amnesty International пачала акцыю па вызваленні Паўла Севярынца
Праваабаронцы заклікалі накіроўваць на імя генпракурора Беларусі Аляксандра Канюка лісты з патрабаваньнем неадкладна вызваліць апазыцыйнага палітыка Паўла Севярынца, піша «Радыё Свабода».
«З дакладных крыніц нам стала вядома пра жорсткае абыходжаньне пад вартай з ветэранам беларускай апазыцыі Паўлам Севярынцам, якога арыштавалі 7 чэрвеня. Павал Севярынец — вязень сумленьня, якога варта неадкладна вызваліць без усялякіх умоў, а да таго часу гарантаваць яго бясьпеку і недатыкальнасьць», — заявіла праваабарончая арганізацыя Amnesty International.
Севярынец быў затрыманы 7 чэрвеня каля свайго дома пасьля таго, як правёў на плошчы перад Камароўскім рынкам у Менску «народны пікет свабоды і салідарнасьці» побач з пікетамі па зборы подпісаў за вылучэньне альтэрнатыўных Аляксандру Лукашэнку кандыдатаў у прэзыдэнты.
Суд Фрунзенскага раёна Менска арыштаваў яго на 15 сутак за ўдзел у адным з папярэдніх перадвыбарных пікетаў. Пазьней Севярынцу былі прызначаныя адміністрацыйныя арышты за ўдзел у іншых акцыях. У выніку некалькіх судовых паседжаньняў Севярынец атрымаў сумарна 90 сутак арышту.
Паводле Amnesty International, «у адказ на беспрэцэдэнтную мабілізацыю апазыцыі і акцыі пратэсту супраць прэзыдэнта Аляксандра Лукашэнкі па ўсёй Беларусі ўлады разгарнулі бязьлітасную кампанію па ачарненьні і затрыманьню асноўных кандыдатаў у прэзыдэнты па сфабрыкаваных абвінавачваньнях».
Amnesty International заклікала ўлады Беларусі «неадкладна спыніць эскаляцыю атак на правы чалавека, вызваліць усіх, каго ўтрымліваюць пад вартай выключна за мірнае карыстаньне правамі, а таксама прыцягнуць да адказнасьці ўсіх вінаватых у парушэньнях правоў чалавека».
Музыка Цім Суладзэ: Розніца 30 гадоў — тое, што адпавядае маім уяўленням пра адносіны41
Каментары