Брэсцкія мытнікі затрымалі 37‑гадовага грамадзяніна Партугаліі, які спрабаваў увезці ў Беларусь наркатычныя рэчывы. Мужчына ехаў праз пункт пропуску «Брэст» як пасажыр рэйсавага аўтобуса, паведамляе Дзяржаўны мытны камітэт.
Для праходжання мяжы мужчына выбраў зялёны калідор і заявіў, што не мае пры сабе тавараў, забароненых або абмежаваных для перамяшчэння праз мяжу.
Падчас мытнага кантролю службовы сабака адрэагаваў на замежніка ў зале афармлення. Аднак нават пасля дадатковага пытання супрацоўніка мытні мужчына зноў адмовіўся прызнаць наяўнасць у сябе забароненых рэчываў.
Пры аглядзе яго рэчаў у заплечніку і чамадане былі знойдзеныя дзве распачатыя пачкі цыгарэт з падазроным змесцівам. Экспертыза паказала, што ў 20 з 40 правераных цыгарэт знаходзіўся гашыш, яшчэ ў дзвюх — марыхуана.
Па факце здарэння Брэсцкая мытня завяла крымінальную справу. Заканадаўства Беларусі прадугледжвае за такое злачынства пакаранне ў выглядзе пазбаўлення волі на тэрмін да дзесяці гадоў.
На час расследавання ў дачыненні да затрыманага абрана мера стрымання ў выглядзе заключэння пад варту.
Каментары