Фота Радыё Свабода
4 жніўня стала вядома, што ў апёкавым цэнтры ў Мінску памёр 29-гадовы Аляксей Сасноўскі. Ён 30 ліпеня пацярпеў ад аварыі на заводзе беленай цэлюлозы ў Светлагорску, паведамляе Радыё Свабода.
У выніку аварыі 30 ліпеня на заводзе пацярпелі двое — зваршчык Аляксей Сасноўскі і слесар Аляксандр Арэх. Яны атрымалі апёкі. На верталёце МНС абодвух даставілі ў Рэспубліканскі апёкавы цэнтр у Мінску.
«Была нейкая паломка, мой брат — ён зваршчык, і ягоны калега — слесар працавалі там. Зрабілі што трэба, і аператар пачаў запуск. Яны засталіся назіраць — каб усё было ў парадку. Не ведаю, што там адбылося, але набраўся шчолачны газ, і ён выбухнуў. Брат і слесар атрымалі апёкі. Мой брат вельмі моцна пацярпеў», — расказваў раней Свабодзе брат Аляксея Андрэй.
Афіцыйна паведамлялася, што прарвала трубаправод, а рабочых, якія знаходзіліся побач, абліло тэхналагічнай вадкасцю з тэмпературай +80 градусаў. У Аляксея Сасноўскага было 90% апёкаў цела, у Аляксандра Арэха — да 40%.
Каментары