Юрыст Сяргей Зікрацкі тлумачыць, чаму рэдактара НН Ягора Марціновіча нельга судзіць за паклёп
Адвакат Сяргей Зікрацкі пракаментаваў справу Ягора Марціновіча ў сваім фэйсбуку.
«Вельмі кароткі юрыдычны лікбез. Чаму журналіста нельга судзіць за паклёп.
Па-першае, за паклёп наогул нельга судзіць. Міжнародныя прынцыпы свабоды выказвання меркавання і дзейнасці медыя зыходзяць з таго, што адказнасць за паклёп можа быць толькі грамадзянска-прававая.
Калі былі распаўсюджаныя выказванні, якія ганяць рэпутацыю, то на медыя або журналіста можа быць накладзены штраф. Але журналіст не можа быць прыцягнуты да крымінальнай адказнасці.
Але ў некаторых краінах яшчэ засталася крымінальная адказнасць за паклёп. Таму — па-другое.
Па-другое, арт. 188 Крымінальнага кодэкса Рэспублікі Беларусь прадугледжвае, што адказнасць за паклёп надыходзіць толькі пры наяўнасці прамога намеру. Гэта азначае, што асоба ведае, што звесткі недакладныя, і тым не менш іх распаўсюджвае.
Журналіст, які атрымлівае інфармацыю ад сваіх крыніц, не можа дакладна ведаць, кажа крыніца праўду ці не. У гэтай сувязі ў журналіста ў абсалютнай большасці выпадку не можа быць прамога намеру на распаўсюд ілжывых выказванняў.
Упэўнены, што справа ў дачыненні да Ягора Марціновіча павінна быць неадкладна спыненая».
Галоўнага рэдактара НН Ягора Марціновіча затрымалі раніцай 23 верасня. Яго затрыманне і крымінальная справа, імаверна, звязаныя з інтэрв'ю дыджэя Сакалоўскага, які расказаў, што на Акрэсціна яго біў у карцары чалавек, падобны да намесніка міністра ўнутраных спраў.
Пасля допыту ў Следчым камітэце Ягора Марціновіча змясцілі на трое сутак у ІЧУ на Акрэсціна.
«Яму па начах сніліся людзі, якіх ён пасадзіў». Сталі вядомыя новыя дэталі апошніх дзён жыцця сына Ярмошынай15
Каментары