Выбары ў ЗША: Байдэн лідзіруе ў двух ключавых штатах, Трамп збіраецца падаваць у суд
Кандыдат ад дэмакратаў Джо Байдэн заявіў, што атрымаў перавагу ў дастатковай колькасці штатаў, каб перамагчы ў выбарах прэзідэнта ЗША, піша BBC.
На раніцу 5 лістапада Байдэн мае 253 галасы выбаршчыкаў супраць 214 галасоў у дзеючага прэзідэнта ЗША і кандыдата ад рэспубліканцаў Дональда Трампа.
Для перамогі адзін з кандыдатаў павінен атрымаць прынамсі 270 з 538 галасоў выбаршчыкаў. Падлік ў ключавых — так званых «хісткіх» штатах — да гэтага часу працягваецца.
Але папярэднія вынікі сведчаць, што Байдэн атрымлівае перамогу ў некалькіх такіх штатах. У прыватнасці, у Мічыгане і Вісконсіне.
У сваю чаргу Трамп атрымлівае перамогу ў іншым важным штаце — Пенсільваніі.
Да гэтага часу цяжка спрагназаваць вынікі ў некалькіх штатах, якія вагаюцца. У прыватнасці, падлік працягваецца ў Арызоне, Невадзе і Джорджыі.
У Джорджыі папярэдне лідарства ўтрымлівае Трамп, у Арызоне і Невадзе — Байдэн.
Калі Байдэн не страціць свае пазіцыі ў гэтых штатах, ён зможа перамагчы.
Сам Джо Байдэн ужо заявіў, што, зыходзячы з гэтых вынікаў, ягоная перамога «ўжо зразумелая».
Штаб Трампа з такой ацэнкай не пагаджаецца і абяцае, што запатрабуе пераліку галасоў у Вісконсіне.
Дзейны прэзідэнт недвухсэнсоўна даў зразумець, што не аддасць перамогу так лёгка.
Ён абвінаваціў дэмакратаў у спробе «скрасці ў нас выбары» і заклікаў спыніць далейшы падлік галасоў выбаршчыкаў і распавёў, што мае намер звярнуцца ў Вярхоўны суд.
Цяпер чытаюць
«Калі б не «Вясна-1996, мы б былі Татарстанам». 30 гадоў таму беларусы ўжо пратэставалі супраць Лукашэнкі і Расіі — як гэта было14
Каментары