Алексіевіч на сустрэчы з Ціханоўскай у Берліне: Збіраю матэрыялы для кнігі пра герояў рэвалюцыі
Сёння Святлана Ціханоўская сустрэлася са Святланай Алексіевіч у Берліне, паведамляе тэлеграм-канал палітыка. Яны абмеркавалі, як можна дапамагчы людзям у Беларусі. Алексіевіч паведаміла, што збірае матэрыялы для магчымай кнігі — гісторыі герояў рэвалюцыі.
Ціханоўская падкрэсліла, што на кожнай сустрэчы з замежнымі палітыкамі распавядае гісторыі беларусаў і што кожную з іх перажывае як асабістую. Алексіевіч, у сваю чаргу, падзялілася, што была пад уражаннем ад таго, як паслы розных краін праявілі салідарнасць і падтрымалі яе ў Мінску, калі была небяспека яе затрымання. Святлана Алексіевіч не змагла заставацца ў краіне і адчувае віну за гэта.
Увечары Святлана Ціханоўская ўзяла ўдзел у мітынгу дыяспары беларусаў. Каля трохсот чалавек са сцягамі сабралася каля Берлінскай канцэртнай залы, на якой была мастацкая інсталяцыя. «Кожны беларус, незалежна ад таго, ён дома ці за мяжой, — цяпер герой. Зараз вельмі важна падтрымліваць адно аднаго і мець зносіны з еўрапейскімі палітыкамі, каб яны дапамагалі беларусам», — звярнулася Святлана да прысутных.
Пасля гэтага Святлана выступіла ў Берлінскім саборы падчас малітвы за мір у Беларусі. Заўтра яна сустрэнецца з федэральным прэзідэнтам Германіі Франкам-Вальтэрам Штайнмаерам.
Цяпер чытаюць
Гурт «Дразды» пакідае сцэну і вінаваціць у гэтым «гіперактыўных блогераў»4
Каментары